Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

nu hân ich zwîvel dar an,
weder ich mich reche oder entuo.
niftel, waz raetest dû dar zuo? «
« nein vrouwe, tuot die rede hin!
iuwer saelde und iuwer sin
diu sint hie zuo ze guot,
daz ir iemer keinen muot
ûf solhe untât gewinnet
und iemer sô g'unsinnet,
daz ir ze manslahte
iemer gewinnet ahte
unde ouch danne z' einem man,
des ir iuch habet genomen an
ze vride und ze huote.
es enwart iu nie ze muote,
des ich gote wol getrûwen sol.
ouch sult ir des gedenken wol,
waz rede iuch mit im ane gât,
diu niwan umbe iuwer êre stât.
soltet ir iuwer êre geben
umbe keines iuwers vîndes leben? «
« waz wiltu danne, daz ich tuo? «
« vrouwe, dâ denket selbe zuo.
gât hinnen, lât in ûz gân.
die wîle muget ir rât hân,
waz iu daz waegeste sî. «
hie mite giengen si dan si drî
durch rât in ir heinlîche.
Isôt diu sinnerîche
« seht « sprach si « ir beide, sprechet an:
waz mag er meinen, dirre man?
er sprach wider uns beide daz,
wolten wir lâzen disen haz,
den wir im lange haben getragen,
er wolte uns guotiu maere sagen.
waz diz sî, des wundert mich. «
Brangaene sprach: « dâ râte ich,
daz in nieman innen bringe
dekeiner slahte undinge,
biz wir bevinden sînen muot.
sîn muot ist lîhte vil guot
hin z' iuwer beider êren.
man sol den mantel kêren,
als ie die winde sint gewant.
wer weiz, ob er in Irlant
durch iuwer êre komen ist.
hüetet sîn ze dirre vrist
und lobet ouch eines iemer got:
daz dirre ungevüege spot
umbe des truhsaezen valscheit
mit ime sol werden hin geleit.
got der haete unser ruoche
an unserre suoche.
wan waere er an den stunden
niht kurzlîche vunden,
weiz got, sô waere er iesâ tôt.
wizze Crist, juncvrouwe Isôt,
sô vüere ez wirs, danne ez var.
habet niht ungebaerde dar,
wan wirt er ihtes innen
und mag er danne entrinnen,
des hât er reht, daz er daz tuo.
von diu dâ denket beide zuo:
bietet ime ez alse wol,
alse man von rehte sol.
daz râte ich iu, des volget mir.
Tristan der ist als edel als ir
unde ist höfsch unde wîs,
vollekomen alle wîs.
swie iu daz herze hin z' im sî,
sît ime doch höfschlîche bî.
binamen, swes er habe gedâht,
in hât ernest ûz brâht.
sîn gewerp und sîn gerinc
der ist umbe ernestlîchiu dinc. «
Sus stuonden s' ûf und giengen dan
und kâmen hin, dâ Tristan
heinlîche an sînem bette saz.
Tristan sîn selbes niht vergaz.
er vuor ûf balde gegen in
und viel sâ gegen in allen hin
und lac den höfschen süezen
vlêhlîche zuo den vüezen
und sprach ouch mit dem valle:
« genâde, ir süezen alle,
habet genâde wider mich!
lât mich geniezen, daz ich
durch iuwer êre und iuwern vromen
her bin in iuwer rîche komen. «
diu liehte cumpanîe,
die liehten alle drîe,
ieglîchiu warf ir ougen dan
und sâhen alle ein ander an.
si stuonden unde er lac alsô.
« vrouwe « sprach Brangaene dô
« der ritter lît ze lange dâ. «
diu küniginne sprach iesâ:
« waz wiltu nû, daz ich im tuo?
mîn herze stât mir niht dar zuo,
daz ich sîn vriunt gewesen müge.