Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

hêrre, des erbe sol ich sîn.
ich selbe heize Tristan. «
Morgân sprach: « hêrre, ir komet mich an
mit alse unnützen maeren,
daz s' alse waege waeren
verswigen alse vür brâht.
ich bin des kurze bedâht:
soltet ir iht von mir hân,
des waere iu schiere state getân.
wan iu enwürre niht dar an,
ir enwaeret ein gezaeme man
einen iegelîchen êren,
daz ir ez soltet kêren.
wir wizzen aber alle wol,
( diu lant sint dirre maere vol)
in welher wîse Blanschefluor
mit iuwerm vater von lande vuor,
ze welhen êren ez ir kam,
wie diu vriuntschaft ende nam. «
« vriuntschaft? wie meinet ir daz? «
« ich ensage iu nû niht vür baz,
wan diser rede der ist alsô. «
« Hêrre « sprach aber Tristan dô
« bî disem maere erkenne ich mich.
ir meinet ez alsô, daz ich
niht êlîche sî geborn
und süle dâ mit hân verlorn
mîn lêhen und mîn lêhenreht. «
« entriuwen, hêrre guot kneht,
dâ vür hân ichz und manic man. «
« ir redet übel « sprach Tristan
« ich wânde doch, ez waere
gevellec unde gebaere,
swer dem man leide taete,
daz er mit rede doch haete
sin unde vuoge wider in.
haetet ir nu vuoge unde sin,
sô leide als ir mir habet getân,
ir möhtet mir doch rede erlân,
diu niuwe swaere wecket
und alte schulde recket.
ir sluoget mir den vater doch.
hie mite endunket iuch noch
mînes leides niht genuoc,
irn jehet, mîn muoter, diu mich truoc,
diu trüege mich kebeslîche.
sem mir got der rîche!
ich weiz wol, sô manc edele man,
des ich hie niht genennen kan,
sîne hende mir gevalten hât.
und haeten sî dise untât,
der ir dâ jehet, an mir erkant,
ir keiner haete sîne hant
zwischen die mîne nie geleit.
die wizzen wol die wârheit,
daz mîn vater Riwalîn
mîne muoter an daz ende sîn
brâhte vür ein êlîch wîp.
ist daz ich daz ûf iuwern lîp
bewaeren unde bereden sol,
entriuwen daz berede ich wol. «
« ûz « sprach Morgân « in gotes haz!
iuwer bereden waz sol daz?
iuwer slac engât ze keinem man,
der ie ze hove reht gewan. «
« diz wirt wol schîn « sprach Tristan.
er zucte swert und rande in an.
er sluoc im obene ze tal
beidiu hirne und hirneschal,
daz ez im an der zungen want.
hie mite sô stach er ime zehant
daz swert gein dem herzen în.
dô wart diu wârheit wol schîn
des sprichwortes, daz dâ giht,
daz schulde ligen und vûlen niht.
Morgânes cumpanjûne,
die vrechen Britûne,
die enkunden ime dâ niht gevromen
noch ze helfe im nie sô schiere komen,
ern laege an dem valle.
iedoch sô wâren s' alle,
als sî dô mohten, an ir wer.
ir wart viel schiere ein michel her.
die ungewarneten man
si kâmen alle ir vînde an
mit manlîchem muote.
warnunge unde huote
der nam dâ lützel ieman war,
wan drungen et mit hûfen dar
und tâten s' alle mit gewalt
ûz hin se velde vür den walt.
hie huop sich ein michel ruoft,
michel weinen unde wuoft.
alsus vlouc Morgânes tôt
mit maneger hande clagenôt,
als ob er vlücke waere.
er seite leidiu maere
ûf die bürge und in daz lant.
in dem lande vlouc zehant
niht wan daz eine clagewort: