Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

sî empfiengen al besunder
ir lêhen, ir liut unde ir lant
von ir hêrren Tristandes hant.
si swuoren hulde und wurden man.
hier under haete ie Tristan
den tougenlîchen smerzen
verborgen in dem herzen,
der dâ von Morgâne gie.
der smerze der begab in nie
weder vruo noch spâte.
alsus gieng er ze râte
mit mâgen und mit mannen
und jach, er wolte dannen
ze Britanje gâhen,
sîn lêhen enpfâhen
von sînes vîendes hant,
durch daz er sînes vater lant
mit rehte haete deste baz.
diz sprach er unde tete ouch daz:
er vuor von Parmenîe
er und sîn cumpanîe
bereitet unde gewarnet wol,
alse der man ze rehte sol,
der ûf angestlîche tât
ernestlîchen willen hât.
Dô Tristan ze Britanje kam,
von âventiure er dô vernam
und hôrte waerlîche sagen,
Morgân der herzoge rite dâ jagen
von walde ze walde.
nû hiez er îlen balde,
die ritter sich bereiten
und under ir rocke leiten
ir halsperge unde ir dinc,
und so daz nieman keinen rinc
ûz dem gewande lieze gân.
nu diz geschach, diz was getân.
und über daz leite ie der man
sîne reisekappen an
und sâzen ûf ir ors alsô.
ir gezoc hiezen si dô
stetelîche wider rîten
und niemannes bîten
und teilten ir ritterschaft.
dâ wart diu groezere craft
geschicket an die widervart,
daz der gezoc waere bewart,
dâ der ûf sîne strâze gie.
dô diz geschach, dô haeten die,
die mit Tristande kêrten hin,
wol drîzec ritter under in.
jene an der widerkêre
wol sehzic oder mêre.
vil schiere wart, daz Tristan
hunde unde jegere sehen began.
die selben vrâgte er maere,
wâ der herzoge waere.
die tâten ez im iesâ kunt.
und er des endes sâ zestunt
und vant ouch dâ vil schiere
ûf einer waltriviere
vil ritter Britûne.
den wâren pavelûne
und hüten ûf daz gras geslagen,
dar umbe und dar în getragen
loub unde liehter bluomen vil.
ir hunde unde ir vederspil
daz haeten sî ze handen.
die gruozten ouch Tristanden
und sîne rotte dâ mite
höfschlîche nâch dem hovesite.
die seiten im ouch iesâ,
Morgân ir hêrre rite dâ
vil nâhen in dem walde.
dar îlten sî dô balde.
dâ vunden s' ouch Morgânen
und ûfe castelânen
vil ritter Britûne haben.
nu sî begunden zuo z' im traben.
Morgân enpfie die geste,
der willen er niht weste
vil gestlîchen unde wol,
als man die geste enpfâhen sol.
sîn lantgesinde tete alsam:
ir iegelîcher der kam
gerant mit sînem gruoze
nâch diser unmuoze,
dô diz grüezen gar geschach,
Tristan ze Morgâne sprach:
« hêrre, ich bin komen dâ her
nâch mînem lêhen unde ger,
daz ir mir daz hie lîhet
und mir des niht verzîhet,
des ich ze rehte haben sol.
sô tuot ir höfschlîch unde wol. «
Morgân sprach: « hêrre, saget mir,
von wannen oder wer sît ir? «
Tristan sprach aber dô wider in:
« von Parmenîe ich bürtic bin
und hiez mîn vater Riwalîn.