Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

gesehen und ouch gehoeret hât:
daz mir mîn oeheim sîn lant
gesetzet hât in mîne hant
und wil ouch durch den willen mîn
êlîches wîbes âne sîn,
durch daz ich sîn erbe sî,
und wil, daz ich im wone bî,
swâ er sî oder swar er var.
nû hân ich mich bewegen dar
und stât mir al mîn muot dar zuo,
daz ich al sînen willen tuo
und wider zuo z' im kêre.
mîn urbor und mîn êre,
die ich in disen landen hân,
die wil ich lîhen unde lân
mînem vater Rûâle,
ob mir 'z ze Curnewâle
iht anders danne wol ergê,
sweder ich sterbe oder dâ bestê,
daz ez sîn erbelêhen sî.
sô stânt ouch sîne süne hie bî
und mit im ander sîniu kint.
die aber sîn erben vürbaz sint,
die haben alle reht dar an.
mîne man und mîne dienestman,
diu lêhen über allez lant
diu wil ich haben ze mîner hant
al mîniu jâr und mîne tage. «
hie wart grôz jâmer unde clage
under aller dirre ritterschaft.
si wurden alle unherzehaft.
ir muot, ir trôst was aller hin.
« â hêrre « sprâchen s' under in
« nû waere uns michel baz geschehen,
und haete wir iuch nie gesehen.
sone waere ouch disses leides niht,
daz uns nû von iu geschiht.
hêrre, unser trôst und unser wân
der was alsô hin z' iu getân,
uns waere ein leben an iu gegeben.
nein leider unser aller leben,
daz wir ze vröuden solten haben,
daz ist erstorben unde begraben,
swenne ir von hinnen kêret.
hêrre, ir habt uns gemêret
und niht geminret unser leit.
unser aller saelekeit
diu was ein lützel ûf gestigen
und ist nû wider nider gesigen. «
ich weiz ez wârez alse den tôt,
swie starc ir aller clagenôt
und swie grôz ir swaere
von disem maere waere E
Rûal, dem ez ze guote ergienc,
der grôze vrume dâ von enpfienc
und michel êre an guote,
daz ez im in dem muote
unsanfter danne in allen tete.
er enpfieng ein lêhen an der stete,
weiz got daz er dekeinez nie
mit solhem jâmer enpfie.
Nu Rûal unde siniu kint
belêhent unde g'erbet sint
von ir hêrren Tristandes hant,
Tristan ergab liut unde lant
gote und vuor von lande.
ouch kêrte mit Tristande
Curvenal sîn meister dan.
Rûal und ander sîne man,
daz lantliut al gemeine,
ob ir clage iht cleine
unde ir herzeswaere
nâch ir trûthêrren waere?
entriuwen daz verweiz ich wol:
Parmenîe daz was vol
clage unde clagemaere.
ir clage was sagebaere.
diu marschalkîn Floraete,
diu triuwe und êre haete,
diu leite marter an in lîp
als mit allem rehte ein wîp,
der got ein gerehtez leben
an wîbes êren hât gegeben.
Waz leite ich nû mê hier an?
der lantlôse Tristan,
dô der ze Curnewâle kam,
ein maere er al zehant vernam,
daz ime vil swaere was vernommen:
daz von Irlande waere komen
Môrolt der sêre starke
und vorderte von Marke
mit kampflîchen handen
den zins von beiden landen,
von Curnwal und von Engelant.
umbe den zins was ez sô gewant:
der dô z' Irlanden künic was,
als ich 'z an der istôrje las
und als daz rehte maere seit,
der hiez Gurmûn Gemuotheit
und was geborn von Affricâ