Autorenseite

 << zurück weiter >> 

Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

584. Der verzauberte alte Kriegsmann in Tönningen.

Als Tönningen noch en Festung weer, da legen da mal veer Suldaten in Gefangenschaft. Nu weer da en grote Huul up den Slottplatz, de da noch to sehn is. De Kummendant wull geern wêten, wat da in weer, un sä to de veer, wenn se em Naricht daœwer bringen kunnen, sullen se dat Lêwen beholden. Se köffen sik nu en Tau, da leten se den enen an hendal. As de dal keem, weer dar en Pêrstall un an jede Siet stünn en lange Reeg van upsadelte Pêr, de harren Hawer vull up in de Krippen un achter jedes Pêrd leeg en Rider up de Streu. Up dat ene End van dat Gewölwe awer weer en grote Tafel, da seet en Offizier an, de harr den Kopp up den Disch stütt. Vœr em up den Disch stünn en brennendes Waslicht un dree Beker, ene weer van Guld, ene van Sülwer, ene van Holt. Da güng de Suldat heran un neem den güldenen Bêker weg; he kunn dat awer nich so sacht doon, dat de Offizier nich upwaakt weer. De seggt: »Is noch nich bald Dag?« »Noch nich«, sä de Suldat. Da maakt de Offizier sine Ogen werrer to un slöppt in.

As dat den eersten nu so good gaan weer, steeg de twete ok hendal. He sünn dat allens êbenso da ünnen un neem den sülwern Bêker van den Disch. De Offizier waakt werrer up un seggt: »Is noch nich bald Dag?« »Noch nich«, seggt de Suldat un güng mit den Bêker foort.

Nu wull de drürre Suldat ok hendal. De sünn da ünnen ok noch allens êbenso, un as he niks meer weg to nêmen finnen kunn, so neem he den holten Bêker mit. De Offizier waakt werrer up un seggt: »Is noch nich bald Dag?« »Nu gliek«, seggt de Suldat, he keem awer ok noch good werrer herut. As nu de veerte da hendal kummt, so is da allens in Uprohr; da sadelt de Rider êhre Pêrde, as wullen se utriden, de annern maakt êhre Gewehre un Säbels torecht un se lopen alle dörchenanner: da würr de Soldat angst un leet sik van sine Kameraden wetter heruptrecken. De Lüde awer seggt, dat de olle Kriegsmann un sien Volk in dat ünnereersche Lock verzaubert sünd, un wenn sine Tied kummt, sall he noch mal werrer kamen un den Krieg föhren gegen den Künnig van Dennemark.

Aus Kurborg am Dannewerk durch Kandidat Arndt.

*

 


 << zurück weiter >>