Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Olli drei.

A Bauer hat drei Buabn im Feld,
Dö lossn gor nix hörn;
Dös fallt'n auf, er geht in d' Stodt,
Und frogg in da Kasern:

»Wia geht's mein Toni?« hot er gfrogg,
Den hot er gern vor olln;
Do schauns 'n on und sogn schön stad:
»Der is bei Wörth drein g'folln.«

»Oh mein Gott, na! – Und unser Hons?«
»Der is mit siebzig Mann
Bei Sedan g'folln.« – – »Und – da Sepp?«
»Der liegt bei Orleans.«

Der Olti sogg ka Wort und geht.
Er holt't sich on ban Kostn,
Ban Stuhl, ban Thürg'schloß, ba der Stiagn –
Er muß a wenkerl rostn.

Selm afn Staffel, grod vorn Haus,
Selm is er niederg'sessn.
Er holt't sein Huat noh in da Hond,
Hot schier af olls vagessn.

Es gehn und fohrn viel tausend Leut,
Viel hundert Wagn vabei,
Da Voda sitzt no allaweil durt:
»– Drei Buabn – und olli drei!«

Karl Stieler.