Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

(103) Wie der unverzagt Held Teurdank des andern
Tags mit dem dritten Ritter über die Balgen über die Balgen ... stach: Lanzenstechen trieb. auf welsch
stach.

Als nun hergieng der ander Tag,
Teurdank nit lenger am Bett lag,
Sonder hört mit Andacht ein Meß,
Daß er darnach zů Morgen eß.
Alsbald das Essen ein End nam,
Teurdank hinfür auf die Ban kam
In seinem welschen Stechzeug gut;
Er hett in im eins Leben Můt.
Desgleichen auch der dritt Ritter tet,
Der genzlich in seinem Můet hett,
Er wollt dem Helden zůfûgen
Schaden und darnach verklûgen,
Es wer nit geren geschehen.
Die Künigin wollt auch zusehen,
Darumb kam si auf die Ban dar
Mit irem Frauenzimmer gar.
Alsbald hůbens an und stachen,
Manch Holz si auf ein ander zůbrachen.
Als nun Neidelharts Ritter sach,
Daß Teurdank am meisten Holz zůbrach,
Befalh er seinem Harnaschmeister,
Daß er im sollte bringen her
Ein Stangen dick und darzů groß.
Damit wollt er dem Held ein Stoß
Geben, daß er wurd stechen nach
Nit mer. Dasselb aber ersach
Auch gleich des Helden Wappenmann,
Sprach: »Herr, er will mit List umbgan.«
Nam damit ein Holz ungefůg,
Das er im under die Arm schlůg,
Sprach: »Nun rennt hin und treffet wol!
Der Untreu er empfinden soll!
Laßt Eur Roß auf das fest laufen,
Trefft Ir in, Ir werdt im kaufen
Ein alte Kappen und ein Hůt.«
Teurdank rennt hin aus freiem Můt
Und traf den Ritter also hart,
Daß er zů derselbigen Fart
Mitsambt dem Roß fiel auf die Ban.
Des erschrak Neidelhart der Mann.
Von dem Stoß dieselbig stark Stang
Geleich in fünf Trümmer sprang.
Also zoch der Held von der Ban;
Die Küngin darab groß Freud gewann,
Daß Teurdank ritterlichen stach.
Alsbald si kam in ir Gemach,
Embot sie dem Helden, ob er
Einicherlei notdurftig wer.
Dasselbig sollt er ir tun kund;
Es wer dann Sach, daß mans nit fund,
Sonst wollt si im das schicken dar.
Teurdank der Helde sprach: »Fürwar
Dank mir der edlen Künigin seer;
Ich habe doch alles das mer,
Dann ich teglich notdurftig bin.
Das sagt der Künigin wider hin,
Darbei meinen freundlichen Grůß;
Ich will noch heint wider zůfůß
Mit der Ritter einem fechten,
Als ich auch getan hab nechten.
Dasselb bin ich si zů sehen,
Damit si müge verjehen,
Wer under uns erlangt den Sig.
An si will ich lassen mich;
Si werd irs lassen gefallen,
Dann vor andern Frauen allen
Dien ich ir von Herzen geren.«
Der Bot genadet dem Herren,
Kam fast eilunds wider dahin
Zů der hochgebornen Künigin
Und saget ir wider die Mer,
Was im vom Held befolhen wer.
Die Künigin darab Gefallen hett.
Nun was es eben worden spet,
Darumb sich Teurdank richt zů tan
Den Kampf mit dem vierten Mann.