Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

(61) Der Teurdank ward auf einem Schweinjeid durch
ein Schwein verletzt, und im sein Pferd under sein zůtod
gestoßen aus Bewegung Unfallo.

Unfallo der hett ganz kein Rast,
Gedacht stets hin und wider fast,
Wie er den Helden bringen mocht
In Leid. Zůletzt er sich bedacht,
Wie daß da wer in disem Wald
Ein hauend Schwein, das lief gar bald
Und hett an im dergleichen Art:
Wann dasselb recht erzürnet ward,
So nam si ires Jägers acht
Und lief an in mit solcher Macht,
Stieß Roß und Mann alls darnieder;
Darnach so lief es bald wider
Weg und den nechsten darvon.
Unfallo sprach: »Möcht ich den Mann
Bringen an dasselb hauend Schwein!«
Mit dem gieng er zům Helden ein,
Sprach: »Herr, mir ist Kundschaft kommen,
Wie mein Jäger hab vernommen
Ein gar groß hauend Schwein nit weit
Von hinnen. Darumbe so reit
Auf disem braunen Türken mein,
Darauf mügt Ir beritten sein;
Stecht die Sau auf demselben Pferd,
Dann Ir im niden an der Erd
Sonst nichts müget angewinnen.
Si ist resch, möcht Euch entrinnen,
Dann ich kenn gar lang dasselb Schwein.«
Teurdank sprach: »So resch mags nit sein;
Ist Sach, daß ich si neur ersich,
Si můß mir halten einen Stich.«
Teurdank auf den braun Türken saß,
Reit eilunds auf der rechten Straß
Den nechsten hinein in den Wald,
Darinnen hört er mit Gewalt
Die Hund vor dem Wildschwein kriegen.
Er sprach: »Die Hund werden nit liegen,
Si haben das Schwein kommen an.«
Damit rannt eilunds der kûn Mann
Den nechsten dem Geschelle nach.
Alsbald in das gemelt Schwein ersah,
Die Hund si alle gar verließ,
Mit dem Rüessel dem Held stieß
Sein Roß gleich mitten in den Bauch,
Darvon es nam ein wilden Strauch
Und tot nider fiel zů der Erd.
Das Schwein beruert auch den Held wert
In solchem Stoß an ein Fůß seer,
Daß er bei Achtagen und mer
Můßt hinken; doch stach er das Schwein,
Daß es můßt tot ligen vor sein.
Dem teuren Held man eilunds bracht
Ein ander Roß. Unfallo dacht:
Ich hoff, die Sach soll jetz wol steen,
Dieweil das Roß nit mer mag geen.
Indem sach er den Held reiten;
Unfallo mocht so lang nit beiten,
Bis der Held wer kommen hinein,
Sonder lief heraus für das Haus sein.
Als er aber den Held gesund sach,
Zů im selber er heimlich sprach:
Ach Gott, was soll ich weiter ton,
So nichts will helfen an dem Mann?
Wie soll ich mit im neur leben?
Teurdank der sprach: »Mir hat geben
Das groß hauend Schwein meinen Lon,
Daß ich gar schier nit meer geen kann,
Eur Roß das ist beliben tot.«
Unfallo sprach: »Es hat kein Not,
So Ir neur seid kommen darvon;
Das Hinken wird Euch wol vergan.«
Aber im Herzen er gedacht:
Wollt Gott, es hett dich gar umb bracht,
Das wer mir am liebsten gwesen,
Ich hoff, du sollst nit genesen
Noch vor den bösen Listen mein.
Teurdank gieng in das Haus hinein
Und ließ im tůn ganz gůten Rat Rat: Hilfe.
An dem Fůß, daran in dann hat
Gestoßen dasselbig Wildschwein.
In Kürz ward besser die Sach sein.