Autorenseite

 << zurück weiter >> 

Bedrachtung

Dhu ich so dorch die Felder ziehe
De Sachsehäuser Berg enuff,
Unn guck de Ebbelbäämcher bliehe,
Da geht merr grad mei Herzi uff.

Des is e Schdaat, e Bracht, e Wunner,
Wie Orjelklang werkt des uff mich,
Ich guck de Weg nach Frankfort runner,
Merr werd ganz fromm unn feierlich.

Ich falt mei Händcher in Gedanke
Unn flöt ganz schdill in mich erei:
»Du liewer Gott, ich dhu derr danke
For all de kinft'ge Ebbelwei!«


 << zurück weiter >>