Wohl weiß auf der Höh
Is der frischg'fall'ne Schnee,
Und is do nit so weiß,
Wie die oa', die i moa'.

Wohl schö' is der Tag,
Wann's a schöner sey' mag
Und is do nit so schö',
Wie die oa', die i moa'.

Was frischer's sichst nie
Was a Pfersibaamblüh',
Und is do nit so frisch,
Wie die oa', die i moa'.

So lieb und so fei'
Moanst, war nix wie da Wei'
Und is do nit so fei',
Wie die oa', die i moa'.

Und weil s' halt so fei',
Daß s' nit feiner kunnt sey',
Drum so sich i s' so gern,
Woaßt, die oa', die i moa'.