Autorenseite

 << zurück weiter >> 

s' Brunnewasser.

In Neustadt hämmer 's jetzt gepackt
Un werklich viel gewunne,
Die Stroße all sin ufgehackt
Vun wege neue Brunne.
Sie führen 's Wasser aus'm Dhal
In scheene breete Röhre,
In jedem Gässel, noch so schmal,
Do kammer 's laafe höre.
Un was for Wasser! Hell un klor,
Ke Trub, ke Schmier, ke Fism –
Nor eene Fehler hot's, 's isch wohr:
Es macht em Remadism.
's isch aa ke Wunner, schun der Luft
Vum Dahl duht schrecklich ziege;
Jetzt noch so Wasser aus der Kluft –
Do kammer leicht was kriege.
's sin werklich sehr viel Leut nit wohl,
Un hän s' Gesicht verbunne:
Na, denk ich geschtern, guckscht emol,
Betrachscht die neue Brunne.
Ich kumm bis an meim Freund sei Haus
Do laafen aa die Röhre –
Ich guck, – do kummt der Docter raus,
Ich frog – was muß ich höre:
Mei Freund isch krank. Jetzt geh ich nei
Und richtig, ja – do hockt er.

»Na, sag ich, Fritz, was fallt der ei?
Ich meen du hoscht de Docter!
Du siehscht jo aus als wie der Dod
Un werscht noch immer blasser –
's isch Remadism! Hör mei Roth:
Des kummt vum neue Wasser!«
»O, sägt er, jo – des bräucht ich noch,
Ich glaab du willscht mich foppe,
Sei still! Du weescht ich trink jo doch
Mei Lebdag nie en Troppe!«

»Gut, sag ich, bleib die Woch deheem
Do schonscht dich un do ruhscht de;
Un nit viel Wasser – 's schüttelt eem,
Ich hab jo aa de Huhschte.
Heut Morge holt mei raulich Mahd
E Flasch vum neue Brunne;
Ich wäsch mich, – hab dann awer grad
Die Zahnberscht nit gefunne.
Ich nemm en Schluck un gorgel als
Behutsam ruf un runner,
Uf emol kummt mer's in de Hals
Un wupp! – do witscht mer 's nunner!
Du kannscht mer 's glawe, wann ich sag:
Ich hab nit viel genumme,
Doch krex ich schun de kanze Dag, –
's muß auch vum Wasser kumme!«

»Ei, sägt mei Freund, des muß so sein!
Ja, glawe dann Ihr Herre
Mer trinkt des Wasser wie de Wein?
Do werr 'n er Euch doch schnerre?«


 << zurück weiter >>