Autorenseite

 << zurück weiter >> 

Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

Ole Leeder in nie Kleeder

 

Regen, Regen rusch!

Regen, Regen rusch!
De König fahrt to Busch.
De König kummt ut 't Sommerland,
En smucken Blomstrusch in de Hand,
Regen, Regen, rusch.
De König fahrt to Busch!

Regen, Regen drus'!
Nu mak em smuck sin Hus!
Mit witte Plumm- un Kassbeinböm
Un rosenrode Appelblöm.
Regen, Regen, drus',
Nu mak em smuck sin Hus!

Regen, Regen, kling!
Ick hör dat Water singn.
De lüttjen Spreen sünd ock all dar,
Se sünd de eersten alle Jahr.
Regen, Regen, kling!
Ick hör dat Water singn!

Regen, Regen, fien!
Hol op, de Sünn will schien'n,
Un Wunner deit ehr gollen Macht,
De König kummt in all sin Pracht,
Regen, Regen, fien,
Hol op, de Sünn will schien'n!

Komp.: 1 st. u. 4st. v. L. C. Gurlitt, f. gemischt. Chor v. Cl. Serpenthien.

 

Danzleed

Söben Ehl in Boddermelk!
Un söben Ehl in Klümp!
Un wenn de Schoh versapen sünd,
Denn danzt wi op de Strümp!

Un hebbt wi ook keen Strümp ni mehr,
So hett dat doch keen Not!
De Freud' is't Schönste op de Eer! –
Denn danzt wi plattbarfot!

Söben Ehl in Boddermelk!
Un söben Ehl in Klümp!
Un wenn wi mal recht lustig sünd,
Wat scheert uns Schoh un Strümp!

De Schoh, de makt de Schosterknast!
De Strümp, de strickt de Olsch'!
Doch mit de Freud', dar hett dat Hast! –
Juch! – danzt wi noch mal Pol'sch!

Komp.: 4 st. v. C. W. Prase. 1 st. v. Cl. Serpenthien. 2- u. 4 st. u. f. gemischten Chor v. L. Jessel.

 

De Bur

Is de Bur nich en Dusendschelm?
Will he'n Danz för'n Sößling hebbn!
Süh, wa he hinkt!
Süh, wa he springt!
Süh, wa de Bur um'n Sößling dingt!

Is de Bur nich'n Leckertän?
Fritt de Eier mitsams de Hähn!
Süh, wa he kaut!
Süh, wa he staut!
Süh, wa de Bur in't Schöttel haut!

Is de Bur nich'n Sackerlot?
Driggt dat Tüg na de nieste Mod'!
Süh, wa dat lett!
Süh, wa he nett!
Süh, wa de Bur sick striegelt hett!

Is de Bur nich'n Susemind?
Treckt na de Stadt mit Fru un Kind!
Un de arme Bur,
Wa hett he dat sur!
Nu wurr he'n Renntier ganz geg'n sin Natur!

 

Ick wull för dusend Dahler nich

Ick wull för dusend Dahler nich,
Dat mi de Kopp af weer.
Denn leep ick rum ahn' min Gesich
Un wüß ni, wo ick meer!
Un alle Lüd, de würrn denn schreen:
Wat's dat för een?! Wat's dat för een?!

Ick wull för dusend Dahler nich,
Dat ick en oles Wiev.
Denn weer ick schrumplich vun Gesich
Un lenterlahm un stiv!
Un alle Lüd, de reepen denn:
»Weg mit de Olsch! na'n Blocksbarg hen!«

Un wat dat Allerleegst darbi:
Denn würr ick menschenschu!
Denn harr 'ck ock ni min lütt' Marie,
Min allerleevst', lütt' Fru!
Denn weer min ganzes Leb'n en Klex,
Un ick darto en ole Hex!

 

Jan, min Mann

Jan, min Mann, steiht hoch in Ehren!
Jan, min Mann, is Nummer Een!
Wassen kann dat Gras he hören
Un in'n Mand de Menschen sehn!

Jan, min Mann, den möt se kamen,
Is de Klökst' in'n ganzen Ort!
Is de Burschap mal tosamen,
Jan, min Mann, de hett dat Wort!

Jan, min Mann, wa kann he snacken,
Allns versteiht he op'n Prick!
Vun de Wild'n un Kakerlacken
Un vun Krieg un Politik!

Jan, min Mann, de mutt berichten,
Wat dar in de Bläder steiht!
Jan, min Mann, vertellt Geschichten,
Dat de Heiloh wackeln deiht!

Jan, min Mann, weet allns to maken,
Weet dat rechte glieks to finn!
Jan, min Mann, in alle Saken
Hett he glieks sin Näs' mit rin!

Jan, min Mann, sitt achtern Aben,
Jan, min Mann, snackt klok un pafft!
Jan, min Mann, vun Mannshand baben
Weet he likers doch nix af!

 

Anna Susanna

Anna Susanna!
Stah op un böt Für!
Ach ne, min leev Moder,
Dat Holt is to dür!

Schür mi den Grapen
Un Kedel un Pann!
Ach ne, min leev Moder,
Dat grippt mi so an!

Anna Susanna!
Nu schür doch geswinn!
Ach ne, min leev Moder,
Dat fallt mi nich in!

Morrn kummt de Frier,
Denn wurrst ni sin Brut!
Makt nix, denn sök ick
Mi'n annereen ut!

Anna Susanna,
De slog dat in'n Wind –
Un nu is en ole Inngfer
Leev Moder ehr Kind!

 

Spinn, min Dochser, spinn

Spinn, min Dochder, spinn!
De Frier sitt darin.
Spinnst du nich en fienen Draht,
Geiht de Frier en annre Strat!
Spinn, min Dochder, spinn.
De Frier sitt darin!

Spinn, min Dochder, spinn!
Um't lüttje is't all Linn'n!
Un wenn he um die friegen deit.
Denn ward all bald de Utstür neit.
Spinn, min Dochder, spinn!
Um't lüttje is't all Linn!

Spinn, min Dochder, spinn!
De Tid flüggt gau dahin!
Bald kummt de Köst mit Smaus un Danz!
Denn driggst den grönen Jungfernkranz!
Spinn, min Dochder spinn,
De Tid flüggt gau dahin!

Spinn, min Dochder, spinn!
Un noch wat wider hin,
Denn sünd ju beid'n all ni mehr twee!
Denn kummt Besök! – denn sünd ju dree!
Spinn, min Dochder, spinn!
Denn settst dat Rad all hin!

 

Min Lüttj' Marie!

Wenn hier en Pott mit Bohnen steiht,
Un dar en Pott mit Bri,
Un denn jüst een vöröwergeiht,
De'n jeder hölt för di,
Denn lat ick beide Pötte stahn,
Un mutt dar erst mal'n beten gahn
Mit mine lüttj' Marie!

Wenn dar en roden Appel liggt,
Un'n gehle Beer darbi,
Un jüst een ankummt vun Gesich
Als du, so hell un bli', –
Ick lat den Appel un de Beer
Un loop un spring dar achterher,
Un griep min lüttj' Marie!

Un wo de Bank in'n Schatten steiht,
Dar kann keen Mensch uns sehn, –
Dar staht wi still un sett uns beid', –
Un sünd dar ganz alleen, –
Min Arm um di, – din Kopp an mi,
Wakeen sünd glücklicher als wi,
Ick un min lüttj' Marie?!

 

Kumm du um Merrennacht

Kumm du um Merrennacht,
Kumm du Klock een!
Vader slöppt, Moder slöppt,
Wi sünd alleen!

Klopp an min Fenster man!
Röhr an de Klink!
Vader meent, Moder meent,
Dat deit de Wind!

Slapenstid gaht de Deev,
Stehlen is Sünn!
Harr ick di ni so leev,
Leet ick di in? !

Lisen de Blangdöhr geiht; –
Kumm du man, kumm!
Ach, wa dat Hart mi sleit,
Fat wi uns um!

Komp.: 1st. v. L. Jessel.

 

Ick un min Lisbeth!

Ick un min Lisbeth wüllt Haberfeld gahn,
Wüllt meihen un binnen, als anner Lüd dahn.

Anner Lüd meihet un binnet dat Korn
Ick un min Lisbeth gaht achter den Dorn!

Achter den Dorn, dar waßt en schön Krut,
Dar binn ick min Lisbeth en Kränzelin ut!

Un kennst du dat Krut ni, so will ick di't nöm'n:
Sünd luter lüttj' smucke blau' Ehrenpriesblöm!

Un gehl sünd de Lucken! un blau is de Kranz!
Juch! ick un min Lisbeth, nu gaht wi to Danz!

Un blau, dat bedüd't ja de Farv vun de Tru, –
Juch! bald is min Lisbeth min leev lüttje Fru!

Komp.: 1 st. v. L. Jessel

 

Ringel, Ringel, Rosenkranz!

Ringel, Ringel, Rosenkranz!
Ketel op'n Füre!
All de lüttjen Deerns to Danz,
Uns so leev un düre!
Ock min lüttje Ann-Marie
Merrn darmank, de bald mit mi
Geiht wul öwer Stüre!

Ringel, Ringel, Rosenkranz!
Alle Hänn tofaten!
Juch! wa fleegt bi'n Ringeldanz
All de witten Platen!
Un wenn denn de Ketel kakt.
Ward en grote Bowle makt.
Un en Glas genaten!

Ringel, Ringel, Rosenkranz!
Wat kann't Schöneres geben?!
Noch en Rundgesang na'n Danz
Mit dat Leevst' daneben!
»Bruder, deine Liebe heißt?«
Nöm se man, un wenn du't dei'st.
Hoch lat wi se leben!

Ringel, Ringel, Rosenkranz,
Dat vergeet ick nümmer!
All' de lüttjen Deerns in'n Danz,
Wat för'n Blomenschimmer!
Un kummt denn de Reeg an mi,
Nöm ick di, lütt Ann-Marie,
Min Hartleevst' för immer!

*

 


 << zurück weiter >>