Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Ick wull, ick harr di nümmer sehn

Ick wull, ick harr di nümmer sehn,
Ja nümmer sehn,
Denn harr dat all keen Not;
Denn seet ick ni des Abnds alleen
Un ween un ween
Mi still de Ogen rot.

Dar babn dar schient so hell de Steern,
So hell de Steern,
Mi dünk, ick kunn di sehn:
Ach, kunn ick rop, – wa wull ick't geern!
Doch in de Feern
Dar leetst du mi alleen.

Hier is ja nix mehr, wat mi hölt,
Nix, wat mi hölt
Mank all de Lust un Freud:
Dat Holt is grön, – de Blom op't Feld,
So schön de Welt,
Un dochen so vull Leid!

Dat ick hier bleev, wat harr ick da'n,
Wat harr ick da'n?
Ick harr di doch so leev;
Mag op de schöne Welt ni wahn.
De nix als Tran,
Als bittre Tran mi geev.

Un wenn de letzte Nacht dat weer,
Ja, letzte weer,
Denn weer dat all verbi!
Ick bün so möd, – ick kann ni mehr;
Un in de Eer,
Dar sleep ick still bi di!

*