Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Lüttj' Köksch

Süh dar! lüttj' Köksch! dat is vun't Slag!
Der Deuscher hal, wa is't en Deern!
En Deern, dat di de Ogen lacht!
Neeg bi so gut, als in de Feern.
Wat scheert mi all de Fräuleins dar,
De finen Pöpp, de vörnehmn Kram;
So'n lüttje Köksch, de nimmt 't förwahr
Doch op mit alle Dam!

Se driggt di Tüffeln an de Föt,
Dat man sick spegeln kann darin;
Se driggt en Rock vun Egenreed,
En Platen vun dat wittste Linn!
Se driggt en Mütz vun Gold so blank,
Un mit en rode Sleuf daran,
Un denn en Spenser knepsch un slank,
Nu süh doch blots mal an!

Wa hett se Flechten in de Haar!
Wa hett se'n Mund, so kassbeinrot!
Wa hett se Ogn, so brun un klar!
Wa hett se'n Farv, als Melk un Blot!
Wa hett se Arms, so dick und drall!
Wa is se leevlich antosehn!
Wa is se plummig, krus un krall!
Un ach, – wa hett se Been!

Kunn'ck de mal küssen, – o, wa geern!
De mutt ja rein als Honnig we'n;
Dar kummt se just, – ick will't probeern,
Wat is darbi? – ick will ehr bedn.
Gudn Dag, lüttj Köksch! wat meenst, min Kind,
Wenn'ck di en blanken Daler bo',
Geevst du mi wul en Kuß geswind? –
Mi dünkt, dat gung, – man to!

Se kiekt mi an, – se steiht un lacht,
Als wull se seggn: du Döskopp, kumm!
Se deit't! – se deit't! dat harr'ck ni dacht;
Na, denn man los! – – ick fat ehr um;
Smatsch! – harr'ck 'n weg! – de brenn! o, o!
Wat meenst, en Kuß? – ick dumme Narr!
En Mulschell weer't! – un noch darto
Een, de sick wuschen harr!

*