Autorenseite

 << zurück weiter >> 

Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

Lüttj' Mantje

Lüttj' Mantje, lüttj' Mantje, wa büst du in'n Togg!
Wa nickst du, wa pickst du de Körns ut'n Trogg!
Wa rust du, wa brust du, un jappst, als en Lünk!
Wa reckst di un streckst di de Been un de Flünk!

Lüttj' Mantje, lüttj' Mantje, wa makst du di natt!
Wa güttst du, wa sprüttst du dat Water ut't Fatt!
Un rüttelst un schüttelst, vertäst als en Klun,
Un pulst di den Bossen un strigelst de Dun!

Lüttj' Mantje, lüttj' Mantje, wa flink op de Been,
Un grabbelst un krabbelst un makst di so schön!
Un tüggst di dör'n Snawel de Feddern henlank,
Lüttj' Mantje, lüttj' Mantje, wa warrst du so blank!

Lüttj' Mantje, lüttj' Mantje, wa büst du so gehl,
Wa hüppst du, ma wüppst du, wa geiht di de Kehl!
Lüttj' Mantje, lüttj' Mantje, wa steiht di de Pull!
Wa singst du, ma springst du so lustig un dull!

Lüttj' Mantje, lüttj' Mantje, wa heff ick di leev!
Du stehlst mi dat Hart noch, lüttj' Mantje, du Deef!
Lüttj' Mantje, lüttj' Mantie, wa bün ick di gut!
Ick wert all, – dat mak ja, du keemst vun de Brut!

Lüttj' Mantje, lüttj' Mantje, wa singst du för'n Leed?
Dat smöt mi, – ick weet ni, so wunnerbar söt!
Dat klingt mi, dat dringt mi den Bossen hendör'!
Lüttj' Mantje, lüttj' Mantje,– dat hest du vun ehr!

Lüttj' Mantje, lüttj' Mantje, – un blifft se mi tru,
Juchheidi! denn freu di! – denn bring ick di 'n Fru!
Lüttj' Mantje, lüttj' Mantje, denn kummt eerst dat best':
Denn fri'st du din Seken, – denn geev ick min Köst!

*

 


 << zurück weiter >>