Vun Herze geht's 'm wann er singt
Un' horcht 'm nor der Wald,
Er richt' sich's nit un' dicht' sichs nit,
Wie's grad de' Mehrschte g'fallt.

'S git aber Vöchl uff der Welt,
Die gebe' gar wohl Acht
Woher der Wind weht un' was juscht
Die Zeit for G'sichter macht.

Do pfeife' se un' flöte' se
Bal' so bal' so e' Lied
Un' mancher hot zum Krüppl sich
Do drüber abgemüht.

Heut' singe' se so sanft mer meent
For Kinner nor zum Schlof
Un' morge' wie diesell' Nachtigall,
Die 'm Bauer freßt die Schōf.

Heut zwitschern se so zimperlich
Un' stelle' sich so charmant
Un' morge' mit eme Mordsgekrisch
Dorchbrülle' se 's ganze Land. –

Mer hot 'n falsche Hund nit gern,
Wann er aach schmeichle' mag,
Un' so gehts trotz der Singerei
Doch denne' Vöchl aach.

Sunscht habe' se 'was vun Straußeart,
Dann fliege' könne' se 'nit
Un' trage' stolz un' hoch de' Kopp,
'S is aber e' Unnerschied:

E' Strauß hot Feddre', die 'was werth,
Die ann're habe' nor Hoor,
Un' wann d' so 'n Vochl verkaafe' wollscht,
So kriechscht kenn' Kreuzer d'rfor.