Do kumme' zwee Vöchl gefloge',
Die singe' im Bäämche 'rum,
Der eene war roth wie die Rose',
Der ee' wie e' Lilieblum'.

Der weiße der singt vun Thräne',
Er singt gar traurig un' trüb,
Der rosige singt aber luschtich,
Der rosige singt vun der Lieb'.

Un' wie se e' Weilche' gesunge',
E' jedder wie Nebbl verschwind't
Un' do hänge' zwee Ring' an de' Aeschtcher
Un' 's langt um 'n jede' deß Kind.

Der Ring vun dem weiße' war Silber
Un' der vun dem rothe' war Gold,
Die Mutter die hot nor den eene'
Vum luschtiche' Vochl gewollt.

Un sie hängt 'n an 'n Hals ihrm Mädche',
'S sollt luschtich gedeihe' drbei,
Un' deß Kind is aach luschtich gewachse'
Un' is worre' so schö' wie der Mai.

Es hot nix gewißt vun de' Thräne
Un' hot ke' Sorge' gekennt,
Aber aach im sechzehte' Summer
Do war deß mit eemol e' End'.

Sie hot am e' stille Morge'
Im Garte' die Blume betracht'
Un' do find't se deß silberne Ringche,
Deß hot se in Wehmuth gebracht.

Vun selbiger Stund war nimmer
Wie sunscht die Luscht so groß,
Der Himml vun ihrm Lebe'
War nimmer wolke'los.

Ja ja, die Vöchl, ich kenn se,
Die Vöchl regiere' die Welt,
Sie fliege' aach als mitenanner,
Als wärn se zammebestellt,

Un' findscht de deß goldene Ringche
Is bal' aach deß anner' dabei,
Es is ke' Ros' ohne Dorne',
Ke' Lieb' vun Thräne' frei.