'S is aber aach oft umgekehrt,
Der Humpe' sicht nix gleich,
Drinn aber blinkts wie flüssig' Gold
An Herrlichkeite' reich,
Oft fehlts an Form un' an Façon
Un' meenscht 's wär' gar nix dra',
Drinn aber is for Lieb' un' Luscht
E' Himml uffgetha'.

Un' doch is deß Exempl nix,
Dann Een's is ganz gewiß,
Daß mehr e' großer Humpe' faßt
Als wann's e' kleener is,
'S git aber Leut' wie die Kameel',
Sie könnte' nit größer sey'
Un' trichterscht dra' aach wie de willscht,
Du bringscht halt doch nix 'nei'.

Un' wiedder manche Ann're git's,
Die gar ke' Riese' sin'
Un' spruddle' doch vun Scherz un' Witz
Als wär' e' Faß voll drinn,
Sich! so ee', wann ich zaubre' könnt',
Deß müßte' mei' Humpe' sey',
Wie viele Liedcher thät' ich do
Mir hole' aus ihr'm Wei'.