Jetz' is der Abl kumme'
Un' der Kain, der böse Bu',
Do habe' die Sorge' schun a'gefangt,
Un' 's Alter aach drzu.

Jetz' is deß weiter gange',
Wie's halt als weiter geht,
Un' Kinner uf Kinner sin kumme',
Als wie mer Erbse' sät.

Die habe' geraaft un' spetaklt,
Die Zeit hot freilich gewehrt,
Was aber helft do' Wehre',
Bei so ere Kinnerheerd'.

So sin halt die Johr' vergange',
Un' habe' se grämlich gemacht,
Un' habe' se aach um die Schönheit
Un' um de' Humor gebracht.

Un' so is se dann endlich worre'
E' uralti Großmamma,
Deß kennt mer an ihre' Naupe'
Un' merkt ihr's überall a'.

Do solle' die Kinner nit muxe',
Als still beisamme' sey',
Die Bube' nit springe' un' tobe',
Die Mädcher nit lache' drei',

Do heest's als Lerne' un' Lerne',
Un' hübsch im Zimmer g'hockt,
Im Freie' do kriecht ihr de' Schnuppe
Un' werd' zum Lumpe' verlockt.

Un' stellt sich eener pumpsich,
So sperrt s' 'n aach wohl ei'
Un' steckt in ihr'm Griesgram
Manch Mädche' in's Kloschter 'nei'.

Jetz', weil se aber doch ewig,
Un' gar nie sterbe' thut,
So geht's vielleicht noch anners,
Un' 's geht vielleicht noch gut.

'S kann sey', sie werd nit älter,
Un' daß se sich verjüngt,
Un' daß se mit ihre' Kinner
Emol wiedder lacht un' singt.

Un' daß se emol wiedder freundlich
Un luschtich werd un schö',
Ich wollt', ich könnt' do lebe',
Un' wär' wiedder jung un' klee.