Dann nor allee' die Phantasie
Kann's Leebe' emm versüße',
Do kann mer habe', was mer mag
Un ungestört genieße'.

So zum Exempl git's viel Leut',
Die leebe' voll Vergniche',
Blos weil se sich einbilde' thun,
Der Deubl woll' se krieche'.

Guckt eeni so een freundlich an,
Un er is weiter 'gange',
So lobt er sich und macht sich weis,
Die hätt' 'n wolle' fange'.

Und red't mer 'm zum e Spielche' zu
Zum Luschtichsey', zum Trinke',
So lacht er, daß er 's glei' gemerkt,
'S thät der Verführer winke'.

Natürlich hot der als en Krieg
Un Streit mit dem Verwünschte',
Un wo e' annrer nit dra' denkt,
Do sammelt er Verdienschte.

Und wann mer 'n en Esl heest,
Deß nemmt er gar nit übl,
Er denkt, ohne Beleidigung
Blüht doch ke' Tugendzwiebl.

So krablt er noch manch'm Tag
Recht siegreich in sein Winkl
Un schloft wahrhaftig selich ei'
In sein'm geliebte' Dünkl.

Ja sich! e' annrer hot deß nit,
Der nix weeß vun Dämone',
Und daß mer als so fechte' muß,
Damit se emm verschone'.

Un recht betracht, is nix rischquirt,
Dann s' hot, so viel mer wisse',
A so e' Unding uff der Welt
Kenn' Mensche' noch verrisse'.

Drum is aach so e' bische' Spliin
Wahrhaftich zu empfehle'
Un muß e' wahri Wohlthat sey'
Vor viele arme Seele'.