'S is wohr, e' Katz is falsch un' stehle' thut e' Hund
Un' um 'n Bär' der tanzt, is' doch ke' Spaß im Grund,
Un' 's schlacht e' Perd oft aus, eh's enner sich versicht,
Un' 's macht e' böser Aff' gar oft e' freundlich G'sicht;

Deß weeß' mer aber doch, un' 's fallt gewiß kemm' ei',
Sich! daß er meent, e' Bär' deß thät e' Schäfche' sey'
Un' daß e' Hund e' Katz un daß e' Aff e' Kuh',
Dann soviel sicht mer doch, wer Aage' hot drzu.

Ganz anners is deß Ding, wann 's an die Mensche geht,
Do is e' großi Kunscht, wann eener die versteht,
Do sich e' Rabe'seel oft aus als wie e' Schwan
Un' hunnertmol e' Fuchs als wie e' Goldfasan.

Do tragt ken' Zottelpelz, wer juscht e' rechter Bär
Un' 's griecht nit, was e' Schlang', geht oft gar flink drher,
Do heult nit, wer e' Wolf, un' brüllt nit, wer e' Stier,
Jetz' lieber Freund d' erroths, was eener for e' Thier.

Es wär' so übl nit, wann so vun Zeit zu Zeit
E' Thierverwandlung käm als Muschtrung for die Leut',
Wo, was eens innerlich, aach ausewendig wär',
E' Wolf, wer wie e' Wolf, e' Bär', wer wie e' Bär.

Gott's Blitz, was ginge' do im e' Collegium
Wie in 're' Menagrie oft Beschtie 'erum,
Do wär' e' Mormelthier nit selte' vornedra'
Un' mancher Gockl' wär' mi'm Gimpl abgetha'.

Die Löwe' wäre' raar, die Katze' desto mehr
Un' 's ging e' Tugendheld oft als e' Bock drher
Un' was die Fablthier, die Drache' un' deß Zeuch,
Wer weeß', mer wär' vielleicht an denne' bsunners reich.

Ja, so e' Muschterung, die wär' so übl nit,
Bekäm' e' jeder dra' gar gute Lehre' mit,
Un' die Erleichterung in Geschäfte' aller Art!
Was wär' emm' do for Müh' un' for Verdruß erspart!