|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
|
|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++
| Was mehr is, als alles Gut un Geld Un' reicher uns macht uf dere' Welt, Deß is e' guter Humor, In dem hockt als noch die Jugend drinn, Wann aach im Gsicht schun Falte' sin', Un' wann aach schun scheckich die Hoor. E' guter Humor macht die Mädcher schö' Un' ziert se mehr als Edelstee' Un' e' guter Humor macht die Bube' frisch, Daß se nit klotze', wie die Fisch; Un' hot e' Weibche' kenn' gute' Humor, Un' wann se so schö, wie die Venus wär', Kenn' Grosche' geb' ich for die Schönheit her: Un' wann sich e' Mann die Brill so richt't, Daß er nix uf der Welt, als Dischtle sicht, Der gleicht demselle' mi'm lange Ohr, Deß heeßt, er hot vum e' Esel 'was Un' e' Esl zu sey', deß is ke' Spaß. Ob der Adam gehat hot 'n gute' Humor, Deß wisse' mer nit, doch kummt's mer so vor, Sunscht hätt' er gewiß was Verdrießlichs gsacht, Wie 'm unser Herrgott die Ripp hot genumme' Un' bot drmit die Eva gemacht. Un' daß die Eva ke' laahmi war, Deß, denk' ich, is eme jede' klar, Sunscht hätt' se den Apl wohl hänge' losse' Un' hätt' ke' verboteni Frucht genosse', Dann nit umesunscht werd e' Spitzbu genennt, An dem mer 'n gute' Humor erkennt. Er bot also aach 'n hischtorische Grund, Hot 'was vum e' Stammbaam, der liebe Kund. E' guter Humor kann herrlich docire' Un' lernt emm e' prächtiges Philosophire', Un' wer es drmit hot so weit gebracht, Daß er über sich selber sich luschtich macht, Wann 'm suscht will wachse' e' narriger Zopp, Der hot mehr Philosophie im Kopp, Als mancher der uf 'm Katheeder steht Un' sich um sublime Syschteme' dreht. E' guter Humor is e' Medicament Un' könnt' mer 'n, wie 'n Syrop, verschreibe', Die Dokter thäte' viel mit vertreibe' Un 's Wassercurire' hätt' bal' e' End. Un' e' guter Humor, der is wie der Wei', Er schließt gar luschtiche Sache' ei, Nor Eens, deß is e' bische betrübt, Er macht wie der Wei' nit selte' verliebt, Un' is mer verliebt, du lieber Gott, Do macht Wei' un' Humor un' Alles bankrott. Drum nor nit verliebe', doch sag' ich's nit laut, Sunscht könnt' ich's mit der Romantik verderbe Un' die schlüg' mer mei' Ritterschloß in Scherbe', Dann deß is vun lauter Humor gebaut. |