|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
|
|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++
| Ihr meent, es gäb' ke' Dämone', Dernocher gäb's aach nit die Gschicht', Die ich euch verzähl' vum e' Mädche' Un' vun so 'me Deublsgesicht. Es geht e' Mädche' spaziere' Un' plückt sich Blume' im Korn, Un' macht sich 'u Strauß uf ihr Hütche' Vun Glöckcher un' Rittersporn. Do kummt e' Dämon geschliche', Gar still wie e' Tigerkatz, Un' wie er ganz nah bei dem Mädche', Hipp! rumplt er d'ruf im e' Satz, Un' packt se' mit seine Tatze' Un' fliegt mit ihr hoch in die Luft, Ach hätt' er se falle' losse', So wär se zu Pulver verpufft. Un' tragt se in schreckliche' Felse' Bis zu sein'm dämonische Haus, Sie is ganz thormlich gewese', Jetzt endlich loßt er se aus. Un' denkt euch, er blinslt gar zärtlich Un' bitt't um e' Liebesgunscht, Die Gränk! so e' Unthier zu liebe', Deß wär' wahrhaftich e' Kunscht. Gottlob, die Mädcher verliere' De' Kopp nit so gschwind, als mer sächt, Deß Mädche' stellt sich nit pumpsich Un' thut, als wär' er ihr recht. »Gern will ich Euch sey', so versprecht se, Verbunne' mit Leib und Seel', Doch müßt Ihr mir hübsch vollziehe' Drei Sache', die ich Euch befehl'.« Do zahlt der Dämon vor Jubl, »»Un' wann ich's nit thu' mei' Schatz, So will ich e' Felseblock werre', So wahr ich bin, uf dem Platz.«« Un' 's Mädche' verlangt als deß Erschte, Ich will, sächt deß niedliche Kind, Ihr sollt mer 'n Liebhaber zeige', Den hitzichschte, den mer nor find'. – Doch lacht der Dämon un' schmunzlt Un' deut't mit de Tatze' uf sich, »»Wahrhaftich bei Schwewl un' Phosphor, Der hitzichschte, deß bin ich!«« »Gut, sächt se, jetz' zeigt mir 'n annre, Der aber noch hitzicher ist, –« Do wechslt der Dämon die Farbe' Un' 's gebt 'm 'n höllische' Riß; Deß hot er natürlich nit könne', Was war der Kerl so dumm, Un' is e' Felseblock worre' Uf ewig versteenert un' stumm. Un' 's Mädche' is weiter geloffe' Un' hot sein'm Schicksal gedankt, Do hot uf eemol die Gegend Mit Erd' un' Himml gewankt; Geb' Acht, der Felseblock kollert Un' rumplt als hinner ihr drei' Un' schlacht mit Dunner un' Krache' De' felsige' Boddm ei'. Gottlob, er is aber vor Aerger Ganz blind d'rnebe' getrollt Un' endlich uf ewige' Zeite' Bis tief in die Höll' 'nei' gerollt. – Jetz' sacht, es gäb' ke' Dämone', Deß kummt mer lächerlich vor, Dann wohr is die Gschicht' mit dem Mädche', Un' gäb's ke', – so wär' se nit wohr. |