'S hot aber aach e' Jeder
E' anner Perdche' noch
Un will er's nimmer reite',
Peift er am letschte' Loch.

Ich will's euch explicire',
Die Zeit, so heeßt der Gaul,
Un der leid't gar kenn' Zichl
Un Zaam im große' Maul.

Deß Thier is voller Naupe',
Dann sinn mer klee' un jung,
So will's nit bsunners springe'.
Als fehlt's 'm an der Lung'.

Doch wie mer älter werre',
Werd jünger als der Gaul,
Un fangt hübsch an zu laafe'
Un thut nimmer so faul.

Un laaft un springt als ärger
Am End' im Carrière,
Deß geht, wie's Dunnerwetter,
Mer sicht un hört nit mehr.

Do is ke' Red vum Halte',
Der Gaul der werd nit müd,
Bis mer de' Hals gebroche',
Des is deß End vum Lied.

Rittmeschter un Bereiter!
Die ihr so gut dressirt,
Do thut emol dressire', –
'S hot's kenner noch probirt.