Die Poesie hot liebe Kinner,
Die schickt se so vun Zeit zu Zeit
Vum Himml zu de' Mensche runner'
In ihrer Herzensfreundlichkeit.

Un' gebt 'n mit aus ihre' Gärtcher
Viel zarte Rose' weiß un' roth
Un' sächt 'n, »'s is viel Freed do drunne
»Un' aber aach viel Kreuz un' Noth.

»Do müßt 'r helfa un' verschön're'
»Un' bringt 'was Gut's vum Himml mit
»Un bringt viel Luscht mit eure' Blume',
»Sunscht glaabt mer euer' Herkunft nit.

»Un' wo sich frische Mädcher freue'
»Do bringt e' Sträußche' mit zum Tanz,
»Un' wann ee' traurig sin' un' weine',
»So tröscht' mer die aach mi'm e' Kranz.

»Un' wann ihr nit vergeßt die Mutter
»Un' habt ihr' Lehre' nit verfehlt,
»So derft ihr widder zu mr kumma
»Un' freu' mich was 'r mr verzählt.

»Wann aber eens im Erdetauml,
»Ich hoff's nit, nimmer an mich denkt,
»Wees' Gott, deß will ich nimmer sehe'
»Un' dem sei' Gärtche' werd verschenkt.«

So sin' vun denne schöne' Kinner
Gar viel gewannert in die Welt
Un' habe' noch der Rees' – im Himml
Der liebe' Mutter vorverzählt.

'S sin' aber mehr noch ausgebliebe',
Ach Gott, deß hot ihr weh getha',
Un' sich! drum kummt halt jetzt gar selte'
Do hunne' so e' Kindche' a'.