Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Fritz Reuter

Läuschen un Rimels

De Giz.

"Jung’", säd’ de Oll, "dat kann nich ewig wohren,
Du büst nu ok all in de Johren,
In uns’re Schaul kannst ok nich wat mihr lihren,
De Preister sall di kunfirmiren,
Un wenn Du Di denn schickst in allen Gäuden,
Denn sallst Du nahsten häuden."
Na, wenn de Oll wat säd’, denn hülp kein Reden;
Ick müßt nu also hen taum Beden.
Uns’ Paster was en klauken Mann;
Hei sach ’t mi glik an mine Ogen an,
Dat ick man ’n beten düsig wir,
Un dat ick öfter up de Pird’,
As up de Bänken in de Schaul hadd reden.
Indessen gung de Sak vel beter as ick dacht:
Ick namm mi hellischen in Acht
Un lihrt den Katekismus un de Bibel
Un lihrt de grote Waterfrag’.
De Preister säd’: "Mein Sohn, nicht übel!
Wenn Du so bei bleibst, kommst Du nach." –
Binah was ick all Primus, as sei ’t nen’n,
Un œwer mi, dor stunnen man noch drei.
Doch jedes Ding, dat hett en En’n;
’Ne Wust hett sogor twei.
De Preister kamm mal nah de Stuw herinner
Un säd’ tau uns: "Min leiwen Kinner,
Was ist das das für ein Mensch, der immer
Sich weidet an des Goldes Schimmer
Un an den eitlen Mammons=Gaben;
Der gierig ist, noch mehr zu haben,
Der immerfort sein Hab’ und Gut vermehrt
Und Schätze sammelt, die der Rost verzehrt?
Wie nennt man einen solchen Mann?"
Hir stunn hei up un wen’nt sick an
Stin Durtig Hannemanns ut Golchen.
"Mein libes Kind, wie nennt man einen Solchen?
’N Gei... ’N Gei...?" Doch Durtig, dei blew stumm.
Herr Je! wat is de Dirn doch dumm!
So dacht ick, un ick plinkt ganz schlau
Den Preister mit de Ogen tau.
Hei würd ’t gewohr un red’t mi an:
"Na, Du mein Sohn! was ist das für ein Mann,
Der fröhnet so verruchtem Laster?
’N Gei... ’N Gei...?" – – – "’N Geistlichen, Herr Paster."