Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Das recht Dorneck lyed

     An eynem mendag es beschach.
Das man di osterrycher ziechen sach,
Vnd Dorneck wollen sy beschowen;
Vnd Dorneck, du vil höches huß,
Du tuost jnen wee in den ougen.

     Ty zugent an der pirß hinab;
Vff Dolneck was menzer Swytzerknab,
Sy hand sich erlich gehalten.
Sy sprachen: »Land sy komen har,
So went wirs gott lan walten!«

     Sy kamen für baß vff dem plan,
Die buchssen Hand sy furher getan,
Dorneck wolten sy erschiessen.
Sy butten jnen mangen snöden wortt,
Es begond sy ser verdriessen.

     Sy zuchent noch necher hinzuo,
Sy lüyeten recht wie ein swytzer kuo,
Es bond die eidgenossen verdriessen,
»So wend wirs maria clagen
Vnd Jhesum dem vil süessen.

     An einem mondtag es beschach,
Das man das leger slachen sach
An Dorneck by der veste,
Vnd Dorneck, du vil höches huß,
Dir koment vil frömbder geste.

     Der vogt, der was ein wyser man:
»Ach gott, wie wellent wirs griffen an,
Das wir die sach verendern?«
Er ließ schnell ein bott hinuß,
Gon Liechtstall tet er jn sennden.

     Vund do der bott gon Liestall kam,
Die eydgenossen warent vor jm do,
Sy sässen jm allem essen:
»Ich bitten üch, fromen eidgenossen guot,
Deren vff Dorneck wellent nit vergessen!«

     Der Schultheiß hinder dem tische saß,
Vnd er den bott anesach:
»Vnd bott, was ist dir angelegen?«
»Ach herr, liebster herre min,
Vnd Dorneck das ist umblegen!«

     Der Schultheiß, der was ein wyser man,
Sin essen, das hat er vor jm stan,
Dennocht wolt er nit bliben.
»Woluff, ir lieben eidgenossen guot,
Die lantzknechten wollen wir vertryben.«

     Sy zugend bald ze Liestall us,
Gegen den osterrychern
Hatten sy keynen gruß.
Keiner wolt daheimen blyben;
Sy zugen vs früschem freyen muot,
Von Dorneck wolten sy vertryben.

     Vund Dorneck, du vil hoches huß,
Der koch, der sluog din kuche vs,
Er tet die hefen schumen;
Eb es ward ein halbe stund,
Da tet man jn die kuche rumen.

     Sy zugent an dem grüenen wald har,
Der Oesterrichern was eine große schar,
Sy hand sich vnerlich gehalten:
Sy fluhen über die grüene heide vs,
die köpff tet man jnen spalten.

     Die eidgenossen hand ein list erdacht,
Sy hand die Schwaben gen Dorneck bracht,
Sy vnd jren gesellen;
Ir sind ein teil von Straßburg gesin,
Es müge, wemm es welle.

     Sy sind gestanden vff vesten grund,
Dry tusent blyben tod vnd wundt,
Das plären tet man jnen vertriben.
Die büchssen, die sy hatten vor Dorneck bracht,
Die sind den eidgenossen blyben.

     Der vns das liedlin Nüwes sang,
Ein früscher eidgenos ist ers genant,
Er hatts gar frölich gesungen:
Er hat mengen Swaben erstochen,
Vnd mit den Straßburgern gerungen.