Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Schlacht bei Nansy. 1477.

    Nun wend wir aber heben an,
das best, das ich gelernet han,
und wie es ist ergangen
zu Nansen zu:
da haltends all ein verlangen.

    Herzog von Lutringen, das edel bluot,
er schreib den puntgenossen guot,
ja wie er wer gelegen
vor Nansen zu
mit manchem künem degen.

    Der punt, der gab vil lüte dar,
der eidgnossen ein große schar
mit werhaftigen handen;
die fürt er mit im
wol in das welsche lande.

    Zu sant Niklausport stund im der sinn;
da lagend sich der Walhen vil:
sy wurdend all erschlagen.
Dem Herzog Karle von Burgund,
dem thete man das sagen.

    Er richt die büchsen uf den plan,
er wont, der punt soll kommen dar:
der won hat in betrogen,
ee er sich hat bedacht,
da hat man in überzogen.

    Er lag in einem tiefen hol:
man zog im zu, das wust er wol,
dennoch wollt er nit fliehen;
wol herrlich thet
er inen entgegen ziehen.

     Es was der Welschen ungelück,
er hat bestellet manchen strick,
daran wolt er sy henken;
an sinen tod
er thet gar wenig denken.

    Sy knüwtend nider uf den plan,
sy ruftend Maryen, gotts mutter, an
mit ufgehepten händen:
»Kumm uns zu hilf
an unserm letzten ende!«

    Sy giengend wider uf den plan,
Sy griffend wider gar frölich an
mit keiserlichem rechte.
Herzog Karle von Burgun
hat vil stolzer knechte.

    Ja sy lüffend durch studen und dorn,
das thetend sy us ganzem zorn,
wann inen was so gache;
sy schuchend da
weder kat noch lachen.

    Da er die scharpfen hallenparten sach,
von denen im zu Murten so we geschach,
darzu die langen lanzen;
in irem reien
wolt er nit mehr tanzen.

    Den vortanz solt er han gethan,
da wolt er im feld nit bestan,
er fieng an zu fliehen;
die eidgenossen begunden
nach im frischlich ziehen.

    Er gstekt in einem graben tief,
menger mann rannt unde lief,
by im wolt niemand blyben;
syn end must er
allein im graben vertriben.

    Ja, ist er je gewesen rych,
dem sicht er ietz ganz ungelich,
da man ihn hat nakend funden;
naket und bloß
mit sinen verserten wunden.

    Nun froüw dich, Hagenbach!
du heigest leid oder ungemach,
din Herr ist zu dir kommen;
üwer beder gwalt
ist üch uf erden genommen.

    Man leit den herzog uf ein bar.
Man fürt in gen Nansen zwar,
ze tod ward er erschlagen;
herzog Reinhart von Lutringen
hat in zu Nansen vergraben.

    Man buwt im ein Capellen an die statt
und da der Herzog erschlagen ward,
mit dryen messen zu meren;
man wichet in
in der helgen dry küngen ere.

     Der uns das liedli nüw gesang,
zwen Schwitzerknaben sind sy genannt,
sy hands gar wol gesungen:
Herzog Karle von Burgun
ist nümen heim gekommen.