Dá G'lehrti, der macht wie-r á Stockuhr sih brád,
Verhüllt seini Schwäch'n in's künstlichi Klád;
Zágt Dátum, Sekund'n, schlagt Viertel und Stund',
Und is oft z'trotz all' seine Fedán nit g'sund!
Ziegt 's Schicksal am Schnürl á Biss'l nur z' gách,
So fallt so á Stockuhr im Nu aus 'm Strách;
Drum sag' ih, dáß nur so á-n-Uhr mir behagt,
Dö 's Nämlichi zágt und áh 's Nämlichi schlagt!

Dá g'wöhnlichi Mensch is á Schwarzwalder-Uhr:
Er geht ohni Künstlikeit still nach dá Schnur:
Sein Guckuck: »das G'wissen« das mahnt 'n getreu,
Und ruft: »Ietzt is wieder á Stünderl vábei!« –
Und is auch sein G'häus' nur von Holz ohni Pracht,
So is auf dö Dauer sein Innres doh g'macht. –
Drum braucht so á-n-einfáchi Schwarzwalder-Uhr
Auch selt'n á-n-ernstlichi Repárátur.

Dö Máderln nach unsrá neumodischen Art
Sán wie die Cylinder-Uhr'n zierli und zart;
Von außen sán s' schmächti, von einwendi drinn
Lauft d' Spindel des Herzens im feinst'n Rubin;
Dö Lieb' nur, dö hágli auf d' Springfedá druckt,
Errát't, was im Rädáwerch hámmert und zuckt:
Doch wann so á-n Ührl vádorb'n ánmal wird,
So wird 's von kán'm Uhrmachá mehr repárirt.

Drum sán má-r áh d' Mádeln und d' Weibá váhaßt;
Á jed's hat wie d' Uhr'n, seini Untug'nden fast;
Das Herz is dö Unruh', dá Wecká dö Zung',
Dö Füß' sán d' Springfedán, sán s' alt odá jung; –
Und erst 's Repetir'n, und am End' noh gar's Schlag'n, –
Nán, nán, – so á Werkel könnt' ih nit vátrag'n! –
Denn will ih grad wiss'n, wieviel als 's hat g'schlag'n,
So wáß ih schon Leut', dö má 's aufrichti sag'n.

Á saubárá Mensch, der nix wáß, noh vásteht,
Der is wie-r á Bilderuhr, dö nit recht geht;
Wie d' Spieluhr'n sán dö Virtuosen bestellt,
Dö nur auf drei Stückeln durchrás'n dö Welt:
Der Sonnenuhr gleich is á treulosa Freund,
Der längá nit Stich halt't, als d' Glückssonn' uns scheint; –
Und tragt mein Gesang so viel Beifall mir ein,
So is 's mein' Pássion, – Repetir-Uhr zu sein!