Da nimm dös kloani G'wánderl;
's is zwar just nit gar fein:
Wann abá 's Frátzerl drinnsteckt,
Wird's gleiwölst saubá sein.

Koan Náderl hab' ih ag'strickt,
Wo ih má nit hätt' denkt:
Wie wird wol 's Frátzerl ausschau'n,
Was da dá Himmel schenkt?!

Wird 's sein, als wie dá Vadá,
Wird 's recht bágschierli wer'n?
Áh freili! – guti Müttá
Segn't ja dá Himmel gern.

Drum nimm! – Und gáb' dá Himmel
Gar zwoa, – schier sollt' má's glaub'n! –
So gib dem oan'n halt 's Rockerl,
'm andán aber d' Haub'n!