Und um dee Zeit,
da wo d' Groamatmaahd ohgeht, da is d' Zweschbnzeit da –
so, Zweschbnbaam,
jetz laß dih recht beutln; Zweschbn, fallts ra!
Ös ganz gschmaachn blaun Zweschbn,
ös ganz süaßn blaun Zweschbn,
enk mag ih gar so viel gern!
– – Saggradi, saggradi! Siehgt 's der Bauer –
der Krowatt tuat schoh wieder plärrn;
glaub aber net, daß mih dees Plärrn gar aso schrecka tät,
wann er sein mentischn Ochsnfiesl net in der Pratzn hätt;

Deifi, Deifi, Deifi,
aso a Ochsnfiesl is dir aber raß!
Wann ih nur dee blaun Zweschbn net gar so gern fraß!

Und ih siehg 's schoh:
auf dee grean Zweschbn kriagst 's Grimma,
auf dee blaun Zweschbn kriagst Schläg,
und Zweschbn hättst mögn und derwischt hast an Dreck,
und hast noh an ganzn Buckl voller Blui –
Baur, deine Zweschbn koh fressn, wer wui!