Und bei der Pfreindtnerin bleibt s' aa-r-a bißl steh,
und nachat muaß s' zu der Seitzn Kathrein geh.

Bruader, da wannst so nachi gangst dene ratschatn Sachn,
aber da müaßt dih bucklig lachn!

Da stellt s' bei der Thalhauserin den schwaarn Korb an Bodn hi,
(weil s' an Schnaps trinkn muaß)
und da kimmt der Thalhauserin sei Hund und hat was im Sih!
Schau, wia er 's Haxl aufhebt!
Und laßt 's scho rinna!

(Oar, denk ih, hat d' Heindlin in sein Korb drinna.)

Bei der Pfreindtnerin wia s' an Korb an Bodn histellt,
kimmt der kloa Spitzl daher und bellt
und riacht.
Aha! sagt er und tuat an G'ruch nachigehn,
is der Thalhauserin sei Hund dagwen.
Und der Spitzl tuat, was er halt toa muaß,
und schickt aa-r-an schön Gruaß.

(Wern scho Oar im Korb drinna sei –
wann 's a gselchts Fleisch waar, wur 's zwider sei!)

Jetz siehgst d' Heindlin bei der Seitzn Kathrein im G'sprach –
d' Hund laffa ihr scho a Zeit lang nach
und freun sih, daß s' an Korb nohmal aus der Hand tuat,
und sagn:
aber der Korb riacht dir guat!

Der Korb riacht nach 'n Schneider Lenz sein Hund,
und nach 'n Hund vom Brunnenmetzger riacht er scharf –
ham mir aa-r-an Bedarf!

(Mei, oh mei! Sie lassen 's gar aso rinna!
Is dengerst koa Mehl und koa Salz net drinna?)

Aha! Jetz merkt 's d' Heindlin aa schoh und schreit:
Jeßmariandjosef!
Jetz is alles gfeit!
Malefizhund, miserablige,
glei laßt's mir meine Kirtanudl steh!
Meine ganzn Kirtanudln ham s' mir versoacht –
san gwiß alle derwoacht!
Und hat d' Frau Bezirksamtmo extri gsagt:
Heindlin hat s' gsagt,
daßt mir fei d' Kirtanudln net vergißt,
weil s' mei Moh gar so gern ißt!

Und dee alt Heindlin lupft an Deckl auf und schaut nach –
ja, hübsch woach is 's scho, dees ganz Sach.

Jetz woant s'.
Jeh, sagt dee ander, da taat ih jetzt recht plärrn
wegn dee Kirtanudln –
wern scho wieder truckn wern!

Müaß' ma s' halt in's Rohr toa! moant d' Seitzn Kathrein,
glei leg ih noh a paar Scheitl in Ofn ein.

Und legt nach.
Und tuat d' Nudln in's Rohr.
Und trocknt s' schö staad.
Is d' Nässn weg und der G'ruch is verwaaht.

Und d' Hauptsach is,
daß da Herr Bezirksamtmo seine Nudln net vermißt,
weil er s' gar so gern ißt.