Da derffat ma ja überhaupts nimmer raffa –
der damisch Kerl, der damisch,
der soll sih halt andere Maßkrüag ohschaffa!
Waar doh gwiß net sei Schadn,
liassat er seine Maßkrüag,
wia's halt früaherszeit aa war,
mit an zinnern Kranzl bschlagn!
Und überhaupts:
wo san denn dee schön zinnern Krüag von der guatn altn Zeit?
Hast a Stund lang damit scherzen könna –
dem Kruag hat nix gfeit!

Aber was den Obern Wirt anbelangt,
dees waar eahm aa wieder net recht,
wann oaner in's Wirtshaus sei Messer mitbringa möcht –
ja,
sollt ma denn jetzt seine dreckatn Gabln hernehma
und oan gleih drei Spitz für oan in's Sitzfleisch neirenna?
Oder moant der damisch Steffi,
er bringt a neue Mod auf,
und mir stecha jetzt mit 'n Löffi?

Und am Samstag,
da hab ih mih mit seiner Kellarin a bißl unterhaltn,
moant er gleih:
dees waarn koane Gspaß und dees liaß er net geltn –
Mei, dee ghört eahm schoh,
so a leetschats Gfriß,
wo s' a rothaarate aa noh is!

Aber dees woaß ih:
ih sag's eahm!
Und am Sunnta werd grad aufbegehrt,
und d' Fenster schmeiß ih eahm ei,
wia daß es sih ghört!