Autorenseite

 << zurück weiter >> 

Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

Bi en Graff.

Slap wol, slap wol in't kole Bett!
Du liggst dar hart op Sand un Steen;
Doch markt din möde Rügg dat ni,
        Slap sanft un wol!

Un't Deckbett liggt dar dick un swar
tohöchden schüttelt op din Hart;
Doch slöppt in Fred, dat drückt di ni,
        Slap sanft un wol!

Du slöppst un hörst min letzt' Adjüs
Un hörst min sehnlichst Klagen ni,
Weer't beter, wenn du't hören kunnst?
        Ne, nümmer, ne!

O, wol is di, ja, di is wol!
Un wenn ick man eerst bi di weer,
So weer't all allens recht un gut;
        Wi harrn uns geern.

Du slöppst un markst nix vun de Klock
In'n Karktorn dör de lange Nacht,
Un wenn op twölf de Wächter röppt
        In't stille Dörp.

Un wenn't an'n swatten Heben blitzt,
Un Wulk an Wulk in'n Dunner kracht,
So fahrt di't Wedder öwer't Graff
        Un weckt di ni.

Un wat di fröh in't Morgenrot,
Bit lat des Nachts bekümmert hett,
Gott Loff, nu kummt di't ni mehr an
        In't stille Graff.

Dar is di wol, dar is di wol!
Un allens, wat du leden hest,
Gott Loff und Dank! in'n kolen Grund
        Deit't ni mehr weh.

Un wenn ick man eerst bi di weer,
So weer ja allens recht un gut;
Nu sitt ick dar un weet keen Trost
        In all min Leid.

Doch bald vellicht, wenn't Gottswill is,
Kummt ock min Sünnabnd still heran,
Un denn, so gravt de Nawer Clas
        Mi ock min Bett.

Un wenn ick ligg un ni mehr lev,
Un wenn se't Slapleed sungen hebbt,
So schütt se mi dat Deckbett op,
        Un denn – adjüs!

Denn slap ick ock so still als du,
Hör nix vun'n Klockenslag in'n Torn;
Wi slapt dar, bit des Sünndags fröh
        De Morgen daut.

Un wenn dar mal de Sünndag dagt,
Un Engeln singt dat Morgenleed,
So staht wi mitenanner op,
        Gesund un frisch.

Un süh, denn steiht dar'n nie Kark,
Se funkelt hell in't Morgenrot,
Wi gaht un singt dar an'n Altar:
        Halleluja!


 << zurück weiter >>