Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Noch en Frag.

Un weest du sülbn denn ock, du leewe Seel,
Warum du für din Kinner wul de Freud
Doch in so'n Bom vull luter Nadeln hängst?
Meenst, wil he gröne Bläder hett in'n Winter
Un spitze Dorns, damit dat Kind ni glieks,
So, als't wul möch, de smucken Saken 'rutlangt.
Dat's gar so unrecht ni, doch weest't ni recht.
Denkst wul, ick segg di't, un ick freu mi drop.

Süh, leewe Seel, vun't Menschenleben schall
De dornig Freudenbom en Afbild we'n.
Neeg bi enanner wahnt ja Leid un Freud,
Un wat di't Leben söt un leevlich makt,
Un wat noch schöner in de Feern swevt,
Du freust di d'rop, doch in de Doerns hangt't.

Wat denkst darto? To'n eersten segg ick so:
Wenn Wehmot in din Freudenbeker drüppt,
Un wenn en scharpes Weh dör't Leben tüggt,
Verschreck di nich un stell di ni so fremd!
Din egen Moder selig, – tröst ehr Gott! –
Se hett di't Bispill in de Kindheit gebn,
Drum denk: »Dat is dar als en Wihnachsbom,
Neeg bi enanner wahnt dar Freud un Leid.

To'n tweeten segg ick di: Dat weer ni gut,
Wenn't anners weer. Wat ut de Doerns 'rutkikt,
Süht hel veel smucker un veel schöner ut,
Un't beste is, dat hölt ock länger vör.
Weer jüst, als wenn man Suckerbrod un Nöt,
Un wat noch sunst an'n Bom so prächtig hangt,
Op eenmal in en Suppenschöttel de',
Un stell di't hin un sä: »Nu et darvun,
So lang du Lust hest!« – Weer't nich Unverstand?

To'n drütten segg ick: Wenn du in de Welt
De Freud wullt griepen, Vörsicht hört darto;
Sunst langst du bald in Nadeln un in Dorns
Un tüggst din Hand tersteken d'rut torügg.
De Freud, de hangt in Dorns, denk mi daran,
An gev en beten acht! – doch wenn du't hest,
So lat di't smecken! – Günn di't Gott der Herr!