Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Frank und Frei

Gott sei Lob und sei Dank,
Ih bin frei, ih bin frank,
Ih bin frank, ih bin frei
Wia der Stoan, den ih kei,
Wia der Stoan, den ih kei,
Wia der Schroa, den ih schrei,
Wia mein Zeiserl, den ih 's Häuserl
Áftua und – flieag zu!-

Áf mein' Grund steht koan Haus
Und mein Haus hat koan' Grund,
Han koan' Ratzn, koan Maus,
Brauch koan Katz und koan' Hund
Gelts Gott, wannst mih bschenkst,
Und Gott gsegn's, wannst mih bstiehltst,
Aber gscheiter, laß's bleibn,
Wannst net ausglacht werdn willst,

Wia mehrer, dáß d' hast,
Und wia mehr, dáß d' verlangst,
Umso größer wird d' Last
Und dein Plag und dein Angst.
Wia 's Háserl sein Gráserl
Findt 's Büaberl sein Liab
Und stiehlst á deine Busserl,
Bist áh noh koan Diab.

's Binkerl áfn Bugl,
Á Rüatl in der Hand,
Roll ih um wiar á Kugl,
Die 's Rastn net kennt.
Wiar á Kügerl, á klingáds,
Wiar á Vogerl, á singáds,
Wiar á Wásserl, á springáds,
Den's in Wald nimmer gfallt.

Gleih wohl bet' in, der Franzl,
All Tag mein Gebet
Oder sing á frischs Tánzl,
Wann die Trüabsal umgeht.
Ih bet' für den Nächsten
Um Sunnschein und Regn
Und sing für den Höchstn
Um Glori und Segn.

In Sunnschein und Regn
Wachst, von was már uns nährn,
Und Glori und Segn
Schafft uns Ruah bein Verzehrn.
Mir fürs Gsang und Gebet,
Há wia guat, mir aft gát,
Dáß már d' Freud net ausgeht,
Das ganz Land á Rábát.

Von den trink ih und iß ih
Und gwánd mih und spiel
Oder kauf már á Dantern,
Wann ih nárrisch sein will.
Freilih Null von Null hebt sih
Jahraus, jahrein,
Doh es liabt sih, es lebt sih
Pfarraus, pfarrein.

Han nia zweng, han nia zviel,
Bin nia arm und nia reih,
Aber just, wiar ih's will,
Dann das hoaßt: frank und frei!
Drum Gott Lob und Gott Dank,
Dáß ih frei bin und frank,
Dáß ih frank bin und frei,
Jucheissá juchei!