Fritz Reuter
De Urgeschicht von Meckelnborg
Fritz Reuter

 << zurück weiter >> 

Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

Äwer Dörchläuchten rep achter her, Krischan Schult süll noch en Ogenblick wedder taurügg kamen. »Krischan«, säd sin gnedig Landsvader tau em, as hei mit sinen Jungen so vör em stunn, »ick holl di eigentlich so tämlich för den Kläuksten in den ganzen Lan'n, un eigentlich müßt ick di tau minen Minister maken; äwer irstens fehlen di alle Manieren, un tweitens 'dein böses Trachten hast du mir verraten, Vogt', du hest di sülwst för en Demokraten utgewen, un dat wardst du inseihn, en Demokrat kann, so lang' de Welt steiht, allseindag' nich Minister warden.« – »Ne«, säd Krischan Schult sihr verstännig, »Dörchläuchten, dat geiht woll nich.« – »Äwer, Krischan«, säd sin gnedigst Landsvader, »ick mag di woll liden, bidd di 'ne Gnad ut.« – Je, nu stunn hei dor as Botter an de Sünn. – Hei wüßt't ok nich. – »Je«, säd hei tauletzt, »gnedigste Herr, ick heww min Lew'lang daglöhneriert, un ut en Swinsuhr is kein siden Geldbüdel tau maken, an mi is nicks mihr tau ännern, ick möt mi nu so dörchwrangen, un wenn ick Arbeit heww, dat ick Brod hollen kann, un ick heww Hüsung, denn möt ick mi ebensogaud as alle annern Daglöhners taufreden gewen. Äwer, seihn S', Dörchläuchten, unsere Kinner... Sall dat Wormtüg nu ewig un drei Dag' ok blot daglöhnerieren?« – »Krischan«, säd de Herr, »du büst jo woll ut mine getreue Vörderstadt Parchen?« – »Ja, Herr«, säd Krischan, »un bün ok mit dat Eldenwater döfft.« – Na, denn hür nipping tau: Ick ward ein ungeheuer liberales Gesetz utgahn laten, dat ein jedes städtsches Daglöhnerkind Schauster un Snider, ok Stadtverordneter un Ratsherr, ja sogor ok Burmeister warden kann. – Büst nu taufreden?« – »Dat 's brav von Sei, Dörchläuchten, sihr brav! Äwer wo ward dat nu mit mine Mitkollegen in't Ridderschaftlich un in't Fürstlich?« – Dat gellt di nich un mi nich wat an, dat hewwen de Herrn von de Ridderschaft un mine Herrn Beamten tau besorgen. Ein jeder feg vör sine Dör. Dine Mitkollegen in't Ridderschaftlich un in't Domanium möten mit Kinner un Kindskinner bet an't En'n der Welt daglöhnerieren, un wen dat nich ansteiht, de kann jo nah Amerika oder in't Preußsch gahn.« – »Ja, Dörchläuchten«, säd Krischan, »dat mag woll in de annern ehren Kram passen, äwer för den gemeinen Mann, de up de ganze Welt nicks wider hett as sine velen leiwen Gören, is dat doch 'ne tau harte Utschriwung; un wat wi richtigen Demokraten sünd, wi fegen nich blot vör uns' eigen Dören, wi fegen ok girn vör frömde Dören.« – »Süh, dat is dat eben«, säd Japhet, »dat ward jug von alle Welt verdacht. Worüm holl't ji jug des Dags äwer nich retireh? Ji kän't jug jo des Abends tau Bedd leggen, jug de Nachtmütz äwer de Uhren trecken un de ganze Nacht bet's Morrens Klock sössen up jugen eigen Schalm Demokrat spelen, un denn bliwwt Rauh in'n Lan'n, un de will ick hewwen. – Äwer dorüm will'n wi uns beid' nich perßöhnlich vertühren, Krischan. – Lieber, Getreuer, du hast vorher den Wunsch ausgesprochen, daß dein geliebter Sohn, Hinning Schult, die militärische Laufbahn einschlagen und es auf dem Felde der Ehre bis zum General bringen möchte. Wir wollen auf diesen deinen ziemlich unverständigen Wunsch in Anbetracht deiner sonst bewiesenen Verständigkeit einen leuchtenden Strahl Unserer Gnade in der Art fallen lassen, daß Wir ihm die ehrebeschlagenen ehernen Pforten dieser Laufbahn öffnen – äwer du sallst seihn, hei leggt in den Nettel! – und ihn als Kadetten in Unserer neu zu errichtenden Kadettenanstalt versuchsweise aufnehmen – Krischan, ich sage versuchsweise! -, um zu erfahren, ob ein Tagelöhnerkind so viel Verstand, Mut und manierlich-gesetztes Betragen besitzt, um es – nu meinentwegen – zum Leutnant zu bringen.« – »Dörchläuchten«, säd Krischan Schult, »Hinning un ick willen uns' Mäglichst dorbi dauhn.« – »Nun, dann seid Ihr hiemit in Gnaden entlassen!« – »Na, denn adjüs ok, Dörchläuchten! – Un kumm, Kandett!« säd Krischan un swenkte sick den Jungen up de Schuller un gung af.

Japhet gung 'rinne in sin Stuw' un stellte sick mit den Puckel an den warmen Aben un säd tau sine leiwe Fru: »Mutting, mi hett de olle spöttische Wind ganz entfahmten dörchhalt, mak mi en lütt Glas heiten Grog.« – »Ja woll«, säd sei, »äwer, Japheting, sühst nu woll, wo dat deiht? Du büst nu blot ein Stun'n buten in den Wind west un hest doch ok wat up un wat in den Liw', un nu klapperst du all mit de Tähnen. Wat meinst du woll, wo dat arme Volk nu woll buten frirt?« Denn sei was 'ne herzensgaude Fru un sihr för den gemeinen Mann, obschonst sei 'ne hoge Königsdochter was – denn sei was 'ne geburne Nimrodden; äwer von ehren sel Vader slog ehr kein Ader. – »Mutting«, säd Japhet, »ick dauh jo, wat ick kann«, un probierte den Grog un säd: »En lütten Schuß kann hei noch verdragen.« – Un as sei em nu noch en Schuß Arrak taugaten hadd, säd hei: »Sei willen Weid' för 'ne Kauh hewwen, un de kann ick ehr nich alltausamen verschaffen.« – »Besinn di dor tweimal up«, säd sei, »denn ick heww dat Unglück in min eigen Fomili hatt, indem dat min sel Vader ok gegen den gemeinen Mann tau hart was un wull ehr kein Kauhweid' gewen un verbet sick dor so dägern up, dat hei dat tauletzt sülwen mit Grasfreten kreg, un wat meinst woll, wo uns Kinner dat schanierlich was, wenn hei uns so mit en Loppen Gras in't Mul vör Ogen kamm?« – »Min Döchting«, säd Japhet un strakte sine leiwe Fru eins äwer, »dat is so'n grotes Unglück nich. – Din sel Vader müggte von lütt up an all girn Salat, un dat hei in sin ollen Dagen roden Klewer för Koppsalat ansach, hadd't ji vernünftiger Wis' up sine ollen Ogen anreken müßt. – De von mine leiwen Unnerdahnen, de kein Kauhweid' krigen känen, de krigen von nu an Representanten.«

Dormit müßt sick denn nu ok de Japheten, geburne Nimrodden, taufreden gewen, un Nigen-Bramborg was de irste Stadt, so en Corpus upricht't würd, tweiuntwintig Mann hoch, d.h. virteihn Öllermanns un acht Wikhushauptlüd', un äwer dat Ganze würd en Öllermannshauptmann set't, de dat Mul up dat rechte Flag hadd, dat hei för den lütten Mann gehürig gegen den Magistrat upkamen künn. Un de Nigen-Brambörger wiren sihr glücklich. Un taum Dank för dit Glück un taum ewigen Angedenken doran hau'ten sei ehre Representanten ut – dat heit in Stein – un stellten sei as Wohrteiken up dat Nige un up dat Stargarder Dur, un dor stahn sei noch bet up den hütigen Dag.

Äwer de Freud' wohrte nich lang'. De Corpus sach mit de Tid mihr up sin eigen Wollbefinnen as up dat von den lütten Mann un wen'nte sick in de Ratssitzung dat Nicken an. Wenn sei in de Ratssitzungen mal nah wat befragt würden, denn nickten sei ümmer mit de Köpp un nickten so lang', bet ehr de Köpp von de Postamente an dat Nige un dat Stargarder Dur affelen, un dat dumme Volk makte sine slichten Witze doräwer un säd, nu, dat sei kein Köpp mihr hadden, seg sick ein jeder von ehr hellschen ähnlich.

So gung dat nu binah in alle Städer, un't würd wedder en groten Larm, denn trotz de schönsten Inrichtungen wiren doch wedder vele, de kein Hüsung krigen un nich fast warden kunnen – äwer't was wohres Takel. In't Ridderschaftlich un in't Domanium wiren't so'ne unripe, dumme Jungs von en Johrener sößundörtig bet virtig, de sick all so'n Johrener teihn mit 'ne Brud 'rümmer treckt, ok all etzliche Kinner in de Welt set't hadden, trotzdem dat de Preisters ehr alle Sünndag de schönsten Vermahnungen hadden taufleiten laten, un in de Städer was dat reine Snurrerwohr. – Na, des' Ort rottierte sick wedder tausam – ditmal in den Jehannsmand Anno... tau Krakow –, un dor heit dat denn wedder: »Will'n nah Dörchläuchten gahn!«

Dat geschach, un en por ihrsame Inwahners von Krakow sloten sick an ehr an mit lütte Dreihörgeln un spelten de scharmantsten Stücke, un so treckten sei dörch Güstrow, wo ein grotes Sloß bugt würd, un de ein säd tau den annern: »Süh, Dörchläuchten lett hir en niges Paleh bugen«, un so kemen sei denn den tweiten Dag recht in de presse Middagssün'n up den Judenbarg an. – De Dreihörgeln spelten wunderschön. – »Vadding, du kriggst en Ständschen«, säd Japheten sine leiwe Fru. – »Ja, 't ward 'ne schöne Ort Ständschen sin!« säd Japhet der Erste un kek dörch de Finsterruten. »Dit is denn nu de richtige Ort.« – »Japheting«, säd sei in ehre Gaudmäudigkeit, »dauh mi den Gefallen un fohr de Lüd' nich an un arger di nich.« – »Lat mi!« säd Japhet, »bün ick mit de Ridderschaft fahrig worden, mit des' ward ick ok sacht fahrig!« un treckte sick in Hemsmaugen ut, denn't was hellschen heit, un tred up sinen Balkan un säd: »Wat ji Rackertüg willt, dat weit ick all lang'. Snurrerwohr, meint ji, ick heww nicks anners tau dauhn, as jugen Drähnsnack antauhüren? – Dor seiht mine braven Krakowschen Börgers an; sei verdeinen ehr Brod ihrlich un erfreu'n dat ganze Land mit ehre Örgel un ehren Gesang; und wo man singt, da laß dich ruhig nieder, säd de Düwel un set't sick in'n Immenswarm. – Doch dat wull ick nich seggen, ick wull seggen: worüm nem ji jug nich ok 'ne Dreihörgel up den Nacken?« – »Ja, Herr«, säd Jehann Smidt – denn de Smidten-Ort is ok all lang' begäng' –, »wenn wi alltausamen, de kein Unnerkamen finnen känen, mit 'ne Dreihörgel 'rümmer trecken wullen, dat würd en schönen Larm warden.« – Na, denn lat't den Apen danzen.« – »Ja, Dörchläuchten, uns' Apen hir in'n Lan'n, de danzen nich, de lasen uns leiwerst danzen.« –«Denn spelt dat schöne Töppkenspill up de Johrmarke.« – »Herr, dor sünd uns' Fingern tau stiw tau von de vele Arbeit.« – »Na, denn...«, säd Dörchläuchten un wischte sick den Sweit af, »denn... weit ick't ok nich. – Wo's Krischan Schult?« – »Ja, Herr«, säd Jehann Smidt, »de Hallunk, de bargt sick woll. – Dat will en Demokrat sin? Un döscht för de riken Börger an den Mark üm den twölwten Schepel, un sin Jung' sall Kandett warden? Up so'ne Demokraten, de sick dat Mul smeren laten, dor haust wi wat.« – »Na«, säd Dörchläuchten tauletzt un wischte sick de groten Sweitdruppen von dat Gesicht – denn dat Regieren grippt hellschen an -, »gaht all nah Amerika. – Meckelnborg is en arm Land, is all gor tau vel äwerbevölkert, indem dat de Ridderschaft doch dorvon ok gaud lewen will. Ja, wenn wi so in de Mark Bramborg wiren, up so en schönen Bodden finnt sick ümmer noch en Platz; äwer wat nich is, is nich. Gaht nah Amerika! Meint ji, dat uns' Herrgott Amerika dor blot so taum Spaß henset't hett? Ne, dat sall ok bevölkert warden. – Un ji sid jo dat nu all hir gewennt, ahn Hüsung up de Strat tau liggen, för jug is dat 'ne plesierliche Sak.« – »Ja, Herr«, säd Jehann Smidt, »äwer dat grote Water.« – »Ih wat«, rep Dörchläuchten, »dat grote Water! – Ick gew jug min heiliges Wurd, dat ick mi üm jug, so drad ji up dat Schipp sit't, ok nich im geringsten bekümmern will.« – »Dörchläuchten«, säd Jehann Smidt, »dat wir wat! – Dat Wurd wir so gaud as 'ne Brügg äwer dat ganze grote Water. – So, Kinnings, nu kamt, nu will wi adjüs seggen.« – »Holt!« rep Dörchläuchten, »eins noch! – Wer sick äwer von Stun'n an ahn Hüsung in'n Lan'n bedrepen lett oder ahn Dreihörgel tau sinen ihrlichen börgerlichen Erwerb, de kümmt in dat Landarbeitshus – ji hewwt jo woll in Güstrow dat Sloß seihn, wat ick för jug dor uprichten lat –; wonach sich ein jeder zu richten! – Un nu adjüs! Un reis't mit Gott!«

Un so tröcken sei af, un de Dreihörgeln spelten: »Juchhei, juchhei! Brunsilgen is nich weit von hier!« un »Auf, auf, ihr Brüder, und seid stark! Die Abschiedsstunde naht... Ins heiße Afrika! Ins heiße Afrika!« – Un Dörchläuchten wischte sick wedder de Sweitdruppen af, ut Mitgefäuhl wegen dat heite Afrika, un wull all 'rinne gahn, dunn tred de oll Mann von den Helpter-Barg wedder vör, de allein taurügg blewen was, un säd: »Dörchläuchten, dat is man, dat ick dorvon red; äwer seihn S', ick bün en ollen Mann un heww all min Afgawen dragen, Kind un Kegel heww ick nich, wat sall ick oll Worm in Amerika? – Ick segg, 't hadd von Anfang an kawelt warden müßt.« – »Hoho!« rep Dörchläuchten, »du kümmst mi grad' recht. – Schandoren, ledd't den Kirl mal äwer de preußsche Grenz!«

Un de Schandoren deden dat, un up Jensid leten sei ein lopen un säden: »So, Brauder, hir kannst du nu so hoch springen, as du Lust hest, an de Preußen is doch nicks mihr tau verdarben.« – Un sei hadden recht, denn ut sine nahgelatenen Poppieren was dat tau seihn, dat de Kirl einen gruglichen Kommunist west was, de dat ganze Land in lute lütte Stücken kortslagen un allens deilen wull, sülwst sogor unsere groten, schönen ridderschaftlichen Gäuder.


 << zurück weiter >>