Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Fritz Reuter

De Urgeschicht von Meckelnborg

Nägentes Kapittel

Mahalaleel was dod, un Jared was storwen, un de lütt Henoch was allmählich in sin Vaders Schauh 'rinne wussen, un was hei en klauk Kind west, würd hei en noch kläukeren Mann; äwer wat helpt all de Klaukheit, wenn ein dat Heft ut de Hand gewen hett? – Hei hadd't verspelt; hei hadd dat irste Privileg' vergewen, hei hadd nich mihr mit einerlei, hei hadd nu all mit tweierlei un, wohrt nich lang', mit fiw- un sößerlei Minschen tau dauhn, denn wer irst einen Finger hett, hett bald de ganze Hand un de anner dortau, un so'n richtig Privileg' is as 'ne gaude Tuchtsäg', dat smitt up einen Worp teigen Farken.

De Eddellüd' würden dicknäsiger un äwermäudiger as tau Rabatten sin Tid, un de Buren würden dämlicher as tau Macholen sin. Was süs noch af un an en lütten gaudmäudigen Junker unner de Eddellüd', de üm den Buren sinen Hawern weg red, oder en ollen weikmäudigen Herr, de 'ne smucke Burdirn en Tweigroschenstück tausmet, wenn sei em dat Heck apen makt; was süs noch en ollen trugen Burjung', de nachts nich bi den Eddelmann in de Appel un Beren steg, oder so'n ollen Vader, de dat Eddelfrölen tau Wihnachten en hübschen Korw bröchte, so reden up Stun'ns de Junkers mit lange Pitschen up de Parforce, un wenn sei kein Hasen un Vöß funnen, denn slogen sei de Buren, un de ollen Herrn meinten, de smucken Burdirns wiren doch gor tau smucke Burdirns, un de ollen trugen Burjungs meinten: »Wat Appel un Beren, sülwern Lepels sünd beter«: un de ollen Vaddings, de säden: »Täuw! Di will'n wi en Schäw riten«, un stickten ehr de Miten an.

As Henoch dit Elend so mit anseihn müßt, würd hei sihr trurig, un eines Dags stunn hei an den Jabelschen See, dunn kamm sin lütt Methusalem 'ranne sprungen un säd: »Vadding, nah Lütten-Varchow 'räwer brennt dat all wedder.« Dunn namm Henoch sinen lütten Methusalem up den Arm un gaww em en Kuß un säd: »Grüß din Mutter velmal von mi, denn ick bün de Sak satt.«

Un somit gung hei äwer dat Is – denn dat was Winterstid – nah de Damerow'sche Sid 'räwer un würd nich mihr seihn.

Weck meinen nu, hei is dorbi in 'ne Wak follen, weck meinen, hei is wegen hüslichen Unfredens mit sine Fru fläuten gahn; de Doktor Reinhold meint, hei is gahn un hett Amerika entdecken wullt; äwer dat selige Eddelmannsgeriww seggt utdrücklich in sine Handschrift: »Hei is in't Elend gahn, wil dat hei sick ein Gewissen dorut makt hett, dat dörch sine Schuld zweierlei Minschen up de Ird kamen sünd, ein Ort mit Privileg – ein Ort ahn Privileg.« – Dat seggt de selig Eddelmann, un wenn hei't sülwst seggt, heww ick keinen Grund, dorgegen tau striden.