Vörrn inne Mar doa wöltern de Swin,
Borg, Saeg, Fasel un Pölk;
Un de lütt Farken, de quiken un schrin,
Un de twe Kalwe de bölk'.

Wasser de jault, den Swanz manke Ben,
Rückt in de Strümp un de Scho;
Man de lütt Dirn de sitt up 'n Sten,
Klappt inne Hänn' un kickt to,

More de steit ünne 't Dur doa un schelt
– Goeren, ick kam mit 'n Schacht! –
Vare de kümmt grar to Middag ut 't Feld,
Vare de süt dat un lacht.

– Lat er man, More! de Goeren hew Daeg
Man inne Pütt un de Mar,
Grar as de Farken, de Pölk und de Saeg
Un as de Faselswin grar. –