Der Fischer woaß, doch hilft's eam nix,
Weil er 'n nia dawischt;
Und Zeugen treibt er aa koan auf,
So viel der Veri fischt.

Grad in der Charwoch ziagt mi'm Netz
Der Fischer dort beim Steg –
Doch geht eam net a Schwanzl ei,
Der Moo, der is ganz weg.

Der Bua vom Veri schaugt eam zua,
Dös G'schäft dem Kloan' g'fallt;
Der Kerl macht si' glei dantschi aa,
Er is da, wia der Alt.

»Du, Fischer.« sagt er, »da fahr her,
Da drinn san s', unterm Gras;
Sixt! – schreit er, wia na 's Netz raufkummt –
Iatzt hat er aa scho was.

Dös san zwoa Bürschling und a Hecht;
Dö ham drei Pfund, bal's g'langt,
Doch bild' Dir Du fei drauf nix ein;
Mir ham scho größ're g'fangt.«