Dös g'freut na den Alten,
Da lacht er schö stad,
»No frisch!« sagt er, »Nikl,
No g'höri aufdraht.

A Loamsiader taugt nix,
Hat nirgends an Wert!«
Dös merkt si der Nikl,
Hat's oft gnua ja g' hört.

Wia's Schulgeh' er anfangt,
Zoagt d' Frischen si glei –
Beim Lerna zwar selten,
Beim Raffa allwei.

Mit Kloane und Große
Fangt's Streiten er oo,
A Loch schlagt in Kopf er
Oam glei, wenn er koo.

Beschweren si' d' Leut aa,
Und schimpfen s' net schlecht,
Der Wirt hilft sei'm Nikl;
»Der – sagt er – hat Recht.

Der laßt si nix g'fallen;
Ja, Nikl, no frisch!
I pack Dir glei selm oo,
Bal i oan dawisch.«

Der Nikl und d' Frischen
San g'wachsen – g'wiß wahr;
Er zahlt Alimente,
Und sitzt scho a Jahr.