Sei Hand schwillt oo, der Arm dazua,
Net weni da derschrickt er;
Zum Dokter und zum Pfarrer drum
Glei bei der Nacht no schickt er.

Doch geht die Sach bald wieder rum,
Net lang drauf g'heilt scho war er;
Dö Spez'ln ziag'n ean iatzt auf,
Daß er glei g'holt an Pfarrer.

Sei Unterhandler gar, der Franz,
Der fragt'n, mit sei'm Aff'n:
»Ja, Sakra, Wirt, brauchst Du denn iatzt
An Pfarrer aa zum Schlaf'n?«

»Ja, Franzl, schau,« sagt der dazua,
Und kratzt so seine Luser,
»I hob mir denkt, beim Herrgott da
Brauch i halt aa an Schmuser!«