Drum kummt do, außer andre Herrn,
A Kapuziner no;
Wenn's in der Fruah Gebet g'läut hat,
Sitzt der im Beichtstuhl scho.

Im Wirtshaus kumma auf Mittag
Die Geistlinga na z'samm;
Der Pfarrhof is ja alt und kloa,
So viel net Platz dort ham.

Beim Tisch wird von der Plag aa g'redt,
Dö oam der Beichtstuhl macht,
Und daß na doch so wen'g oft hilft,
Wenn ma's genau betracht.

»Mi,« sagt der Kapuziner da,
»Mi ärgert dös allwei,
Wenn, so wia heut, dös Erst, dös kummt,
Scho g'langet glei für drei.«

Da kummt d' Frau Wirtin zu die Herr'n;
Begrüaßt die werten Gäst;
Und red't halt aa, daß so viel Leut
Heut kumma san zum Fest.

»Und all's hat beicht, Herr Pater, net?
– Zu dem möcht gar jed's hi' –
I war nur froh, daß i bei eam
Die »Erst« glei g'wesen bi.«