Ob er verzählt, ob anschafft er,
Beim dritten Wort, ganz g'wiß,
Wenn's aa net paßt, sagt er zum Schluß:
»Wia's aa net anders is.«

Heut kummt er scho in aller Fruah
Auf d' Sektion glei nei.
A Klag hat er, drum schaugt er aa
Fuchsteufiswild scho drei.

»Herr Ingenieur, der Maier do,
Der mit sei'm schelchen Biß,
Der muaß sofort entlassen wern –
Wia's aa net anders is.«

»»Is recht,«« sagt drauf der Ingenieur,
»»Doch muaßt an Grund aa ham;
Thuast Unrecht eam – dös merk Dir fei –
Na wachs' mer wir zwoa z'samm.««

»Dös woaß i scho,« sagt der Palier,
»Drum hören S' den Verlauf;
Do sitz beim Wirt i gestern drinn
Und lus halt aa so auf.

Da sagt der Kerl vor alle Leut,
– Mir gibt's ja glei an Riß –
Daß i an Staat betrüagen that –
Wia's aa net anders is.«