Max Hofmann
Wia der Schnabi g'wachsen is
Max Hofmann

 << zurück weiter >> 

Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

Der neugieri Schneider.

          Drinn in der Stadt, im vierten Stock,
A Schneider hat d' Logis;
A Schulhaus von dem Viertel dort,
Dös is sei vis-à-vis.

In's Zimmer von die Kloanen sieht
Dös Mannerl schnurgrad nei;
Koo er aa nix derseg'n dort,
Neig'schaut muaß dengast sei.

Er holt sogar, was doch net bräucht,
Sei alt's Spektivi raus,
Und glotzt damit na umanand,
Daß wirkli is a Graus.

An Lehra wird dö Gaudi z' dumm,
Was z' viel is, dös is z' viel,
Drum denkt er nach, wia dera G'schicht
Er setzen kunnt a Ziel,

Da fangt a Buaberl 's Woana oo:
»Mir thuat mei Hals so weh.«
»Kumm raus zu mir – sagt er dazua –
Kumm her nur, Maxl, geh!«

Er führt zum Fenster 's Büberl hi,
Der Schneider siecht dös g'nau –
»Mach's Maul auf!« sagt der Lehrer drauf,
»Daß i in Hals Dir schau!«

Der Maxl reißt's weitmächti auf,
Streckt d' Zung raus lang dazua –
Seitdem hat vor dem Schneider aa
Der Lehrer iatzt a Ruah.


 << zurück weiter >>