Fritz Reuter
Läuschen un Rimels, Neue Folge
Fritz Reuter

 << zurück weiter >> 

39. Respekt vör'n Großherzog sinen Rock

Oll Stein tau Lüssow hadd so'n schönen Klewer,
Doch ein verdammte Postelljon,
De führt ein ümmer langs heräwer.
Hei ward nu up den Kirl mal luren –
Un richtig! kriggt ok den Patron.
Un as hei'n bi den Wickel hett
Un em nu in den Bussen fött
Un mit den Stock em will traktieren,
Dunn seggt de Kirl: »Weg mit den Stock!
Dit is den Großherzog sin Rock,
Den möten S' an mi respektieren.«
Dunn seggt oll Stein: »Entfamte Snäsel!
Meinst, ick wir so en dummen Esel,
Dat du mi bringt in Schücheri?
Ne, in de Snut kriggst eins von mi,
Un de hürt di!«


 << zurück weiter >>