Waldlerisch

Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

Wöigngsangl für mein Buabn

Strampfl no, liaba Bua,
Strampfl no, strampfl zua!
Wöi ma' sih wiahrt af d Leut,
Lern s bo da Zeit.

          Grouß wenns wirst, aft vor olln
          Louss dir koa' U'recht gfolln;
          Hau eini mit da Faust,
          Dass olls grod saust!

Schrei no, mei' liaba Bua,
Schrei, Büabal, schrei no zua!
Wer af da Welt net schreit,
Bringt s ah net weit.

          Konnst eps, vostehst dei' Stuck,
          Steh vor koan ondern zruck,
          Zerst oba lus und lern,
          Aft zoigst dein Herrn!

Trink no, mei' liaba Bua,
Trink, Büabal, trink no zua,
Aft wirst scho' grouß und stoark,
Do is koa' Soarg

          Holt in' Trunk Moß und Ziel!
          Oamol a' Glasl z viel,
          Trifft sih a' frouhe Stund,
          Richt dih net z Grund.

Schlof ejtz, mei' liaba Bua,
Schlof, Büabal, schlof no zua!
Dass d recht groa'st, dass d gedeihst,
Dih am Leben gfreust!

          Oarbatst, so schau dazua,
          Nimm dir derweil für d Ruah,
          Aft bleibt gsund Seel und Lei,
          Wirst olt dabei.