Fritz Reuter
Läuschen un Rimels, 1. Folge
Fritz Reuter

 << zurück weiter >> 

Anzeige. Gutenberg Edition 16. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

22. Dat kümmt endlich doch an den Rechten

                                De oll Postmeister Möller fröggt
Den Jungen, de de Breiw utdröggt:
»Hest du de Breiw besorgt, Jehann?«
»Ja, Herr!« – »Ok den, de an
Den Jehann Krischan Engel wir,
De bi den Snider Block is in de Lihr?
Hest du sin Wahnung endlich funnen?«
»Ja, Herr«, antwurt de Burs, nahdem hei sick besunnen,
»Ja, Herr. Doch mit den ollen Breiw
Dor gung mi dat tauirst ganz eklich scheiw;
De Sak, de was sihr bisterig,
Denn in de Laagerstrat, dor wahnt hei nich
Un wahnt en En'n lang wider an den Strand;
Un wahnt nich rechtsch – ne! linker Hand;
Un wahnt ok nich in't drüdde Stock –
Ne! hei wahnt unnen in en Keller,
Sin Meister is nich Snider Block,
Sin Meister, de heit Snider Teller;
Hei sülwst, hei heit nich Krischan Engel –
Ne! hei heit Ann'meriken Dürten Rist,
Un't is ok keinen Sniderbengel –
Ne! Herr, 'ne olle Waschfru is't.«

 << zurück weiter >>